دووکەڵ و بۆنی بیرە نەوتەکان خەڵکی باعەدرێ هەراسان دەكات
K24 - دھۆك
دووکەڵ و بۆنی بیرە نەوتییەکان هاووڵاتیانی ناحیەی باعەدرێی سەربە قەزای شێخانی نیگەران کردووە، وەك خۆیان باسی دەکەن منداڵەکانیان بەهۆی دووکەڵ و بۆنی ناخۆشی بیرە نەوتییەکان دووچاری چەندین نەخۆشی بوونەتەوە، قایمقامی قەزای شێخانیش دەڵێ "بیرە نەوتییەکانی سنووری باعەدرێ بە گوێرەی پێوەری زانستی لێدراون و بەهیچ شێوەیەك کاریگەری لەسەر تەندروستی هاووڵاتیانی ناوچەکە نییە".
خێری سوهەین، دانیشتووی باعەدرێ بە كوردستان24 راگەیاند: "شەوانە منداڵەكانمان ناتوانن بخەون، لەبەر بۆنی نەوت".
ھاووڵاتیەكی دیكەی باعەدرێ بەناوی جوقی خەلەف، دەڵێت: "زۆر لە ھاووڵاتیانی باعەدرێ بەتایبەتی بە تەمەنەكان بەھۆی دووكەڵ و بۆنی نەوت تووشی تەنگە نەفسی بوونە".
سەردار یەحیا، قایمقامی قەزا شێخان بە كوردستان24 راگەیاند: "خەڵكی شێخان دڵنیا دەكەینەوە، بیرە نەوتییەكان ھیچ زیانی بۆسەر تەندرووستی ھاووڵاتیان نابێت، چونكە بە گوێرەی پێوەری زانستی لێدراون".