له كه‌ركووك بڕيارى رووخاندنى گه‌ڕه‌كه زياده‌ڕۆكان جێبه‌جێده‌كرێت
K24 – هه‌ولێر:
پارێزگارى كه‌ركووك به وه‌كاله‌ت، راكان جبوورى، فه‌رمانێكى نوێى ده‌ركردووه بۆ رووخاندنى سه‌رجه‌م ئه‌و گه‌ڕه‌ك و شوێنگه بازرگانيانه‌ى به زياده‌ڕۆيى له سنوورى قه‌زاى ناوه‌ندى كه‌ركووك درووستكراوون.
به گوێره‌ى نووسراوێكى ره‌سمى، كه وێنه‌يه‌كى ده‌ست كوردستان24 كه‌وتووه و به ژماره (2759)ى ئه‌مڕۆ سێشه‌ممه 27ى ئازار/ مارسى 2018 ده‌رچووه، هاتووه : "رۆژى پێنجشه‌ممه‌ى كۆتايى ئه‌م هه‌فته‌يه، له سه‌نته‌رى شارى كه‌ركووك، هێزێكى هاوبه‌شى ئه‌منى له يه‌ك كاتدا ده‌ستده‌كات به رووخاندنى سه‌رجه‌م شوێنه زياده‌ڕۆيه‌كان".
له نووسراوه‌كه‌دا هاتووه: به به‌شدارى قائيمقام و به‌ڕێوبه‌رى شاره‌وانى و به‌ڕێوبه‌رى خانوبه‌ره له ديوانى پارێزگا كۆبوونه‌وه‌يه‌ك ئه‌نجامدرا و تێيدا ئه‌م بڕيارانه ده‌ركران:
يه‌كه‌م: پێكهێنانى هێزێكى هاوبه‌ش له ده‌زگاى دژه تيرۆر، پۆليسى ئيتيحادى، وه‌ڵامدانه‌وه‌ى خێرا، پۆليسى كه‌ركووك، حه‌شدى شه‌عبى، يه ياوه‌رى ئه‌فسه‌رانى ده‌زگاى دژه تيرۆر و پۆليسى ئيتيحادى و پۆليسى كه‌ركووك و حه‌شدى شه‌عبى.
دووه‌م: له يه‌ك كاتدا ده‌ستده‌كرێت به لابردنى زياده‌ڕه‌وييه‌كان له‌سه‌ر شوێنه بازرگانى و خزمه‌تگوزارييه گشتييه‌كانى ته‌واوى ناوچه‌كانى كه‌ركووك.
سێيه‌م: ئه‌و هێزانه ياوه‌رى ئه‌و ليژنه‌يه ده‌كه‌ن، كه قايمقامى قه‌زاى ناوه‌ندى كه‌ركووك به گوێره‌ى بڕيارى 154ى ساڵى 2001 تايبه‌ت به هه‌ڵگرتنى زياده‌ڕه‌وييه‌كان رۆژى پێنجشه‌ممه‌ى داهاتوو ده‌ستبه‌كار ده‌بن.
چواره‌م: قائيمقام هه‌ماهه‌نگى له‌گه‌ڵ فه‌رمانده‌كانى حه‌شد و ئه‌و هێزانه ده‌كات، كه له كه‌ركووك هه‌ن.
پێنجه‌م: شاره‌وانى كه‌ركووك، سه‌رجه‌م ئامێر و پێداويستييه‌كانى تايبه‌ت به لابردنى زياده‌ڕه‌وييه‌كان دابين ده‌كات.
.jpg)
ده‌ركردنى ئه‌م بڕياره دواى ئه‌وه هات له مه‌راسيمى كردنه‌وه‌ى ئاگرى نه‌ورۆز له كه‌ركووك، به‌رپرسێكى يه‌كێتى نيشتيمانى كوردستان، له باره‌ى رووخاندنى شوێنه زياده‌ڕۆييه‌كان وتبووى: "پارێزگار شه‌كرى شكاند".
به گوێره‌ى ئه‌و بڕياره نوێيه‌ى پارێزگارى كه‌ركووك به وه‌كاله‌ت، زۆربه‌ى بازار و گه‌ڕه‌كه كوردييه‌كانى كه‌ركووك به هۆى ئه‌وه‌ى تاپۆيان نييه و به زياده‌ڕۆيى درووستكراوون، ده‌ڕووخێنرێن.
له 2003ه‌وه كه‌ركووك رزگار كراوه و له ژێر ده‌سه‌ڵاتى ئيداره‌ى كورديدا بووه و پارێزگارى شاره‌كه كورد بووه، به‌ڵام تا ئێستا زۆربه‌ى گه‌ڕه‌كه كوردييه‌كان و ماڵ و حاڵى ئه‌و ئاوارانه‌ى دواى 2003 گه‌ڕاونه‌ته‌وه زێدى خۆيان بۆ كه‌ركووك، تاپۆيان نييه و به ره‌سمى له لايه‌ن ئيداره‌ى كورديى شاره‌كه‌وه نه‌ناسێنراون.
گه‌ڕه‌كى په‌نجا عه‌لى، كه زياتر له 35 هه‌زار ماڵى هاووڵاتيانى كورديى تێدايه به‌رچاوترين گه‌ڕه‌كى كورديى زياده‌ڕۆيه له كه‌ركووك و پێشتر له لايه‌ن ئيداره‌ى كورديى كه‌ركووكه‌وه كارى ياسايى و نه‌خشه و رێككارى تاپۆكردنى بۆ نه‌گيراوه‌ته به‌ر.
هه‌روه‌ها شوێنى بازرگانى و گه‌ڕه‌كى زياده‌ڕۆ، له گه‌ڕه‌كه‌كانى شۆڕيجه، ئازادى، ئيمام قاسم، بارووتخانه، فه‌يله‌ق، سه‌رچنار و ده‌روازه كراونه‌ته‌وه.
هه‌روه‌ها له سه‌ر رێگه‌ى گشتى كه‌ركووك-سلێمانى و كه‌ركووك-هه‌ولێر، ده‌يان شوێنكار و هۆڵ و كۆگا و شوێنى بازرگانى درووستكراوون و سه‌رجه‌ميان له لايه‌ن هاووڵاتيانى كورده‌وه درووستكراوون و هيچكامێكيان تاپۆيان نييه و به زياده‌ڕۆ هه‌ژمار ده‌كرێن.
ده‌ركردنى ئه‌م بڕيارانه، دواى ئه‌وه دێت، له 16ى ئۆكتۆبه‌رى 2017دا به‌شێك له به‌رپرسانى يه‌كێتى له‌گه‌ڵ حه‌شدى شه‌عبى و سوپاى عێراق به سه‌رپه‌رشتى سوپاى پاسداران رێككه‌وتن و بڕيارياندا ده‌روازه‌كانى كه‌ركووك به رووى له‌شكرى سوپا و حه‌شدا بكه‌نه‌وه و رێگرى له به‌رگرى هێزى پێشمه‌رگه بكه‌ن و رووداوه‌كه‌ش له لايه‌ن هاووڵاتيانى كورددا به "خيانه‌تى شازده‌ى ئۆكتۆبه‌ر" ناوده‌برێت.
ئ.ر