سه‌رۆك بارزانی سوپاسی هه‌ڵوێستی هاوسه‌نگی رووسیا ده‌كات
K24 - هه‌ولێر:
سەرۆك بارزانی سوپاسی هەڵوێستی دۆستانە و هاوسەنگ و واقعبینانەی ڕووسیای فیدڕاڵ ده‌كات و باڵیۆزی رووسیا له عێراق بایه‌خی وڵاته‌كه‌ی بۆ په‌یوه‌ندییه‌كانیان له‌گه‌ڵ هه‌رێمی كوردستان ده‌خاته روو.
له میانی دیدارێكی نێوان سه‌رۆك بارزانی و باڵیۆزی رووسیای فیدراڵ له عێراق كه ئه‌مڕۆ سێشەممە 10/ 4/ 201 به‌ڕێوه‌چوو، په‌یوه‌ندییه‌كانی نێوان هه‌ر دوو لا و ره‌وشی سیاسی ناوچه‌كه تاووتوێ كراوه‌و دوایین پێشهاتە سیاسییەكان و بابەتی ڕووبەڕووبوونەوەی تیرۆر خراوه‌ته روو.
ماكسیم ماكسیمۆڤ باڵیۆزی ڕووسیا لە عێراق، سڵاوی تایبەتی وەزیری دەرەوەی وڵاتەكەی بە سەرۆك بارزانی گەیاند و وێڕای ئاماژەدان بە پەیوەندییە مێژووییەكانی نێوان ڕووسیا و گەلی كوردستان گووتی: "هەرێمی كوردستان بۆ ڕووسیا بایەخێكی تایبەتی هەیە و وڵاتەكەی خوازیاری مامەڵەكردنە لە گەڵ هەرێمی كوردستان" .
هه‌روه‌ها هیوای خواست كە ئەو پەیوەندییانە گەشە پێ بدرێن و ئامادەیی كۆمپانیاكانی ڕووسیایشی بۆ فراوانتركردنی پەیوەندییەكان لە كەرتی نەوت و ئابووری لەگەڵ هەرێمی كوردستان خستەڕوو.
سەرۆك بارزانی سوپاسی هەڵوێستی دۆستانە و هاوسەنگ و واقعبینانەی ڕووسیای فیدڕاڵ كرد لەمەڕ بارودۆخی سیاسی و ئەو تەحەددیاتەی كە لە چەند مانگی ڕابردوو بۆ هەرێمی كوردستان هاتنە ئارا.
ئەوەیشی خستەڕوو كە پێكەوەژیان و ئاشتیخوازی و نەبوونی حەساسیەتی ئایینی و مەزهەبی بەشێكی گرنگی فەرهەنگی گەلی كوردستان پێكدەهێنن
باڵیۆزی رووسیا له عیراق، پێزانینی بۆ گەل و حكوومەتی هەرێمی كوردستان هەبوو كە پارێزەری مافی مەسیحییەكان و پێكهاتە ئایینی و نەتەوەییەكانی ترە.
