داعش ھێرشی كردە سەر باشووری كەركووك

K24 - كەركووك

شەوی رابردووی چەكدارانی داعش ھێرشیان كردە سەر باشووری كەركووك و دوو چەكداری حەشدی شەعبیان كوشتووەو ژمارەیەكی دیكەش بریندارن، لە داقوقیش ئەفسەرێكی پێشمەرگە رفێندراوە.

ھێمن دەلۆ، پەیامنێری كوردستان24 لە كەركووك رایگەیاند: "لە گوندی قەرەتەپەی سەربە ناحیەی یایچی باشووری کەرکووك، داعش هێرشێکی فراوانی کردووەتە سەر لیوای 16ی هێزی ئیمامەینی سەر بەحەشدی شەعبی، لە شەڕێکی سەختدا، دوو چەكداری حەشدی شەعبی كوژراون و 10 دیکەش بریندار بوونە".

گوتیشی: "لە لایەكی دیكە و ھەر شەوی رابردوو لەسنووری گوندی زەنقەڕ، لە باشووری داقووقیش چەکدارانی داعش ئەفسەرێکی هێزەکانی پێشمەرگە و چوار كەسی دیكەی بە رەگەز عەرەبیان رفاندووە".

خەڵکی گوندەکە بە پەیامنێری كوردستان24 راگەیاندووە: "ئەو ئەفسەرە ناوی فەرهاد ئاغایە و کاکەییە لە دوای 16 ئۆکتۆبەرەوە گوندەکەی خۆیانی جێهێشتووە، بەڵام دوێنێ بە مەبەستی دروێنەی گەنم گەڕاوەتەوە گوندەکەیان و لەلایەن ژمارەیەك چەکدارەوە، کە گومان دەکرێت داعش بن، بەرەو شوێنێکی نادیار رفێراوەو تاکوئێستاش چارەنووسی نادیارە".

ھەر لەبارەی رووداوەكانی شەوی رابردووی شاری كەركووك پەیامنێرمان گوتی: "لە گەڕەکی ئەسراو مەفقودینی شاری کەرکووکیش ژمارەیەك چەکدار تەقە لە گەنجێکی عەرەب دەکەن بەناوی مەعن مەحموود، دەستبەجێ گیانی لەدەستدا".

ھ.م