سه‌رۆك بارزانى: هه‌ڵوه‌شاندنه‌وه‌ى ده‌نگى پێشمه‌رگه بڕيارێكى زاڵمانه‌يه و به هه‌موو شێوه‌يه‌ك دژى ده‌وه‌ستينه‌وه
K24 – هه‌ولێر:
سەرۆك مەسعود بارزانی، لە سەلاحەددین پێشوازی لە دۆگڵاس سڵیمان باڵیۆزی ئەمەریكا لە عێراق و شاندێكی یاوەری كرد.
لە دیدارەكەدا باڵیۆزی ئەمەریكا لە عێراق پیرۆزبایی سەركەوتنی لیستی پارتی دیموكراتی كوردستانی لە سەرۆك بارزانی كرد و جەختیشی لە رۆڵی سەرۆك بارزانی و هەرێمی كوردستان كردەوە لە پڕۆسەی سیاسیی و قۆناغی دوای هەڵبژاردن و ئەوەیشی دووپاتكردەوە، كە وڵاتەكەی خوازیاری ئەوەیە كە هەرێمی كوردستان بەهێز بێت و رۆڵی كاریگەری لە پڕۆسەی سیاسیی عێراقدا هەبێت.
هەر لەو كۆبوونەوەیەدا هەردوولا بیروڕایان لەبارەی دوایین پێشهاتە سیاسییەكان و دەركەوتنی هاوكێشەی تازە لە عێراق و قۆناغی دوای هەڵبژاردن و هەوڵەكان بۆ پێكهێنانی حكوومەت ئاڵۆگوڕ كرد.
سەرۆك بارزانی جەختی لەوە كردەوە، كە ئەوەی بۆ هەرێمی كوردستان ئەولەویەتە و پێویستە لایەنەكان رەچاوی بكەن پابەندبوونە بە سێ پڕەنسیپی هاوبەشی و تەوافوق و هاوسەنگییە لە بوارە جۆراوجۆرەكانی حوكمڕانی و لەژێر سایەی ئەو سێ پڕەنسیپە پێویستە زۆر بە روونی رێككەوتن لەسەر بابەت و كێشەكان و پێكهێنانی حكوومەتی تازە بكرێت.
سەبارەت بە پڕۆسەی هەڵبژاردن و ئەنجامەكان سەرۆك بارزانی ئەوەی بە شاندی میوان راگەیاند، كە تێبینیی زۆریان لەسەر ئەدای كۆمیسیۆن و بەڕێوەبردنی پڕۆسەی هەڵبژاردن و دەستكاری ئەنجامەكان و ساختەكاری هەیە.
ئەوەیشی خستەڕوو، كە پارتی هیچ نوێنەرێكی لە كۆمیسیۆنی هەڵبژاردنی عێراقدا نییە و بە عەمد ژمارەیەكی زۆری دەنگی پارتیان سووتاند بە تایبەتی دەنگی كەمپەكان و دەنگی خوشك و برا ئێزیدییەكان و ئامانجیش لە سووتاندنی ئەو دەنگانە ئەوە بووە كە رێگری بكرێت لەوەی پارتی دیموكراتی كوردستان لە پارێزگای نەینەوا دەنگی یەكەم بێت كە لە راستیدا دەنگی یەكەمە.
لە درێژەی وتەكانیدا سەرۆك بارزانی ئەوەی دووپاتكردەوە كە بۆ نەهێشتنی گومانەكان و خاوێنیی پڕۆسەكە پارتی بە هەموو رێكارێك رازی بووە جا چ ژماردنەوەی دەنگەكان بێت یان بەدواداچوون بۆ سكاڵاكان لە هەر ناوچەیەك تەنانەت دووبارەكردنەوەی هەڵبژاردنەكانیش. بەڵام هەوڵدان بۆ یاریكردن بە ئەنجامەكان و هەڵوەشاندنەوەی دەنگی پێشمەرگە بە هیچ شێوەیەك قابیلی قبوڵ نییە. ئەوە زوڵمێكە لە پێشمەرگە دەكرێ و پێشمەرگە مافی خۆیەتی و پارێزگاری لە وڵاتەكەی كردووە و حەقی لەسەر هەموو لایەك هەیە و بۆچی دەبێ دەنگی پێشمەرگە بە بێ هۆكار و لەپێناو مەرامی سیاسیی هەڵوەشێندرێتەوە؟
سەرۆك بارزانی ئاماژەیشی بەوەدا كە كاركردن بۆ هەڵوەشاندنەوەی دەنگی پێشمەرگە ئاماژەیەكی مەترسیدارە و كاركردنە بۆ هەڵوەشاندنەوەی ئایندە و چارەنووسی كوردستان، بۆیە بە هەموو شێوەیەك لەبەرامبەر ئەو بڕیارە زاڵمانەیە دەوەستینەوە.
