دوو تەقینەوە لە كەركووك روویاندا

K24 - كەركووك

ھێمن دەلۆ، پەیامنێری كوردستان24 لە كەركووك رایگەیاند: "بەرەبەیانی ئەمڕۆ دوو تەقینەوە لە شاری كەركووك روویاندا، بەپێی زانیارییەكان زیاتر لە 10 كەسی ھێزەكانی عێراق برینداربوونە".

گوتیشی: "تەقینەوەی یەكەم لە رێگەی ئۆتۆمبێلێكی بۆمبڕێژكراو بوو، كە خۆكوژێك لێیدەخوڕی، لەسەر رێگەی كەركووك- بەغدا، لەپێش كۆگای سندووقەكانی دەنگدان تەقییەوە".

پەیامنێرمان روونیكردەوە: "ئەو شوێنەی تەقینەوەكەی لێ رووداوە، بازگەیەكی ھاوبەشی دژەتیرۆری عێراقی و ھێزەكانی پۆلیسە، لەناو بریندارەكانیش ھاووڵاتی سڤیل ھەن، چونكە شوێنی تەقینەوەكە رێگایەكی سەرەكییە".

لەبارەی تەقینەوەی دووەم، پەیامنێری كوردستان24 گوتی: "تەقینەوەی دووەمی ئەمڕۆی شاری كەركووك، لە رێگەی بۆمبیكی چێندراو بووە، لە نزیك مزگەوتی حاجی سەدری، كە ئەویش دەكەوێتە سەر رێگەی بەغدا، بە گوێرەی زانیارییەكان ھیچ زیانێكی گیانی نەبووە".

ئەوەشی خستەڕوو: "ھێزە ئەمنییەكانی عێراق رێگە نادەن، میدیاكاران بچنە شوێنی تەقینەوەكان و رووماڵی بكەن، دوای تەقینەوەكانیش ھێزەكانیان لە ناو شاری كەركووك بڵاوە پێكردووە".

بەھۆی بۆشایی ئەمنییەوە، ماوەیەكە چەكدارانی داعش لە سنووری كەركووك دەستیان بە ھێرش و تەقینەوە كردووەتەوە، ھێزە سیاسییە كوردییەكانیش لە چەند رۆژی رابردوو ھۆشداریان لەبارەی دۆخی ئێستای كەركووك دا و داوا دەكەن بۆ پاراستنی سەروماڵی ھاووڵاتیان پێویستە ھەرچی زووە پێشمەرگە بگەڕێتەوە كەركووك و ناوچە كوردستانییەكانی دیكە.

لە 16 ئۆكتۆبەری2017، بە بڕیاری حكوومەتی عێراق شاری كەركووك داگیركرا و ھێزی پێشمەرگە لە كەركووك و ناوچە كوردستانییەكان كشایەوە، لەو كاتەوە بۆشایی ئەمنی لە ناوچە دروست بووە، بۆیە ئێستا جگە لە لایەنە سیاسییەكان، خەڵكی كەركووك و ناوچەكانی دیكە، داوای گەڕانەوەی پێشمەرگە دەكەن.

ھ.م