سەرۆكی چوار وڵات دۆخی ناوچەكە لە توركیا تاوتوێ دەكەن
K24- ههولێر:
سەرۆکی ھەر یەك وڵاتانی تورکیا، رووسیا، ئەڵمانیا و فەرەنسا لە 7ی ئەیلوول بۆ تاوتوێکردنی رەوشی سووریا و ناوچەکە لە ئیستانبوڵ کۆدەبنەوە.
رەجەب تەیب ئەردۆغان، سەرۆککۆماری تورکیا، لە لێدوانێکیدا بۆ رۆژنامەی ڤەتەنی تورکی، رایگەیاند: "لە 7ی ئەیلوول، ئێمە میوانداری دیداری تورکیا، رووسیا، ئەڵمانیا و فرەنسا لە ئیستانبوڵ دەکەین و باس لە کێشەکانی ناوچەکە دەکەین".
بڕیارە ئەو چوار وڵاتە پرسی سووریا و ناوچەکە تاوتوێبکەن، ئەمەش لە کاتێکدایە، پێشتر ئەنگێلا مێرکڵ، راوێژکاری ئەڵمانیا، رایگەیاندبوو، پرسی سووریا بەبێ بەشداری کارای رووسیا، تورکیا، ئێران، ئەوروپا و چەند هێزێکی دیکەی ناوچەکە چارەسەر ناکرێت.
تورکیا بە داگیرکردنی شاری عەفرین لە سەرەتای ئەمساڵدا، یەکەم دەستێوەردانی راستەوخۆی لە سووریا کرد و هێزە کوردییەکانی لەو شارەی رۆژئاوای کوردستان وەدەرنا.
H.J