ئەردۆغان: هێرشکردنە سەر تورکیا هاوشێوەی هێرشکردنە سەر بانگی مزگەوتەکانە

K24 – هه‌ولێر:

رەجەب تەیب ئەردۆغان، سەرۆککۆماری تورکیا، هێرشکردنە سەر ئابووری تورکیا بە هێرشکردنە سەر "ئاڵای نەتەوەیی و بانگدان (بانگدانی مزگەوتەکان)" دەزانێت.

بەگوێرەی هەواڵێکی سپۆتنیکی رووسی، ئەمڕۆ دووشەممە، ئەردۆغان لەبارەی سزا ئابوورییەکانی سەر تورکیا لەلایەن ئەمەریکاوە گوتویەتی: "ئەوانەی دەیانەوێت لە رێگای ئاڵوگۆڕی دارایی چۆک بە تورکیا دادەن، زوو تێدەگەن کە ئەوان هەڵەن".

ئەردۆغان دەشڵێت: "هێرشکردنە سەر ئابووری تورکیا جیاوازی نییە لە هێرشکردنە سەر ئاڵای تورکیا و بانگدانی مزگەوتەکان".

سەرۆکی تورکیا پێشی وایە خەڵکی تورکیا دەتوانن بەسەر تەواوی کۆسپەکاندا زاڵببن و ئەو قۆناخە تێپەڕێنن.

بەهۆی زیندانیکردنی قەشەیەکی ئەمەریکی لەلایەن تورکیاوە، پەیوەندی نێوان واشنتن و ئەنقەرە روو لەهەڵدێرە و ئەمەریکا چەند سزایەکی بەسەر تورکیادا سەپاندووە کە بوونەتە هۆکاری دابەزینی بەرچاوی بەهای لیرەی تورکی.

H.J