توركیا هێزی زیاتر ره‌وانه‌ی سنوور ده‌كات

له‌ به‌هێزكردنی پێگه‌ سنوورییه‌كانی به‌رده‌وامه‌

K24 - هه‌ولێر:

له‌گه‌ڵ نزیكبوونه‌وه‌ی ده‌ستپێكردنی ئۆپه‌راسیۆنی كۆنتڕۆڵكردنی ئیدلب، توركیا له‌ ویلایه‌تی "كلیس" هێزی زیاتر ره‌وانه‌ سه‌ر سنووره‌كانی ده‌كات له‌گه‌ڵ سووریا (نێوان باكوور و رۆژئاوای كوردستان).

به‌ گوێره‌ی ئاژانسی هه‌واڵی ئه‌نادۆل، ره‌وانه‌كردنی كاروانه‌ سه‌ربازییه‌كان بۆ به‌هێزتركردنی پێگه‌ سه‌ربازییه‌كانییه‌تی كه‌ له‌ ناوچه‌ سنوورییه‌كان جێگیری كردووه‌.

ماوه‌یه‌كه‌ هه‌ریه‌ك له‌ وڵاتانی رووسیا، ئێران و سووریا، سه‌رقاڵی ئاماده‌كارین بۆ كۆنتڕۆڵكردنه‌وه‌ی ئیدلب، كه‌ دوایین پێگه‌كانی چه‌كدارانی ئۆپۆزیسیۆنه‌ له‌ سووریا، هه‌رچه‌نده‌ ئه‌و هه‌وڵانه‌ بووه‌ته‌ جێگه‌ی نیگه‌رانی ئه‌مه‌ریكا و توركیا، به‌ڵام هه‌ر سێ وڵات سوورن له‌سه‌ر ئه‌نجامدانی ئۆپه‌راسیۆنه‌كه‌.

پێشتریش له‌ لووتكه‌ی نێوان توركیا، ئێران و رووسیا له‌ تاران، ره‌جه‌ب ته‌یب ئه‌ردۆغان داوای كرد ئۆپه‌راسیۆنه‌كه‌ ئه‌نجام نه‌درێت، به‌ڵام داواكه‌ی به‌ ناڕاسته‌وخۆ ره‌تكرایه‌وه‌ و سه‌رۆكانی هه‌رسێ وڵات نه‌گه‌یشتنه‌ رێككه‌وتن.

وه‌زاره‌تی به‌رگری رووسیاش رایگه‌یاندووه‌، گرووپه‌ چه‌كداره‌ "نایاساییه‌كان" له‌ ئیدلب، له‌ پێشێلكردنی ئاگربه‌ست به‌رده‌وامن، كه‌ پێشتر به‌ گوێره‌ی رێككه‌وتنی نێوان رووسیا، توركیا و ئێران راگه‌یه‌ندراوه‌.

ا. م