سعوودیە پیاوێک بەهۆی خواردنی نانی بەیانی لەگەڵ کچە هاوکارێکی دەستگیردەکات

K24 – هه‌ولێر:

بەرپرسانی وڵات سعوودییە پیاوێکی میسری بەهۆی نانخواردن لەگەڵ کچە هاوکارێکی دەستگیردەکەن.

لەکاتی خواردنی نانی بەیانی، پیاوەکە ڤیدیۆیەکی خۆی و کچەکەی بڵاوکردۆتەوە کە تیایدا نان دەخۆن و پێدەکەنن لە رێستۆرانتی هۆتێلێکی شاری جەدەی سعوودییە، ئەمەش بەرپرسانی شارەکەی تووڕەکردووە و بە پێچەوانەی یاساکانی وڵاتی سعوودییەی دەزانن.

بەگوێرەی هەواڵێکی رۆژنامەی گاردیانی بەریتانی، وەزارەتی کاری سعوودییە رایگەیاندووە، ئەوان ئەو هاووڵاتییە میسرییەیان بەهۆی بڵاوکردنەوەی "ڤیدیۆیەکی نەشیاو" دەستگیرکردووە.

لە وڵاتی سعوودییە، ژن و پیاوان گەر سەر بەیەک خێزان نەبن یاخود زۆر نزیک نەبن، ناتوانن پێکەوە لە شوێنە گشتییەکان دابنیشن و نان بخۆن.

جیا لەو پیاوە میسرییە، خاوەنی هۆتێلەکەش لەلایەن بەرپرسانەوە سزادراوە.

H.J