دوو تۆمەتبار لە رانیە دەستگیر كران

K24 - رانیە    

پۆلیسی ڕاپەڕین دوو کەسی بە تۆمەتی دزیكردن دەستگیركرد، کە هەردووکیان پێشینەی تاوانکاریان هەبووە و یەکێکیان لەکاتی دەستگیرکردنی مادەی هۆشبەری پێبووە.

رائید شۆڕش ئیسماعیل، وتەبێژی پۆلیسی راپەڕین بە كوردستان24ی راگەیاند: "هێزەکانمان پاش بەدواداچوون و هەوڵێکی زۆر لە بنکەی پۆلیسی حاجیاوا بۆ دۆزینەوەی تۆمەتباران و سود وەرگرتن لە کامێراکانی چاودێری، لە شەوی 4/11/2018، کەسێکیان دەستگیرکرد بەناوی ( د،ب ) تەمەن 29 ساڵە و دانیشتووی قەزای رانیەیە، ئەو كەسە هەستاوە بە دزینی چەندین کەل و پەلی وەك پارە و زێڕ و چەک و کۆمپیوتەر و هەندێك شتی دیكەی ناو ماڵ لە ناحیەی حاجیاوا سەرەڕای ئەوەش لە کاتی دەستگیرکردنەکە چەند جۆرێك لە مادەی هۆشبەری پێوە گیراوە کە بەکاری هێناون".

گوتیشی: "کەسی دووەم بەناوی ( ر،ح) تەمەنی 32 ساڵ دانیشتووی چوارقوڕنە کە پێشتر لەلایەن هێزکانمان لە نەهێشتنی تاوانی پشدەر دەستگیر کرابوو لەگەڵ تۆمەتباری یەکەم چەند جارێك بەیەکەوە تاوانی دزیان ئەنجامداوە".

وتەبێژی پۆلیسی راپەڕین راشیگەیاند: "هەردوو تۆمەتبارەکە پێشینەیان لە تاوان هەیە و پێشتر لەسەر تاوانی دزیکردن حوکم دراون".