گۆڕان: بەشداریکردنمان لە حکوومەت تاوان نییە
K24 - سلێمانی
ئەمڕۆ شاندی دانوستانکاری پارتی دیموكراتی كوردستان لەشاری سلێمانی لەگەڵ بزووتنەوەی گۆڕان کۆدەبێتەوە و ئەندامێكی جڤاتی نیشتمانی بزووتنەوەی گۆڕانیش رایدەگەیەنێت، بەشداریكردنیان لە حكوومەت تاوان نییە.
نەسرەدین مەحموود، ئەندامی جڤاتی نیشتمانی بزووتنەوەی گۆڕان بە کوردستان24ی راگەیاند: "بەشداریکردنی گۆڕان لە کابینەی نوێی حكوومەتی هەرێمی کوردستان تاوان نییە و بەلامانەوە ئاساییە بەشداری لە حکوومەتدا بکەین".
گوتیشی: "بزووتنەوەی گۆڕان هێشتا یەکلایی نەبووەتەوە، کە بەشداری لە حکوومەتدا دەکات یاخود نا، بەڵام ئەگەر بەشداریش بكەین دەمانەوێت خزمەتی وڵات و میللەتی خۆمان دەكەین".
ئەمە لەكاتێكدایە شاندی پارتی دیموكراتی كوردستان گەڕێكی دیكەی دانووستانی لەگەڵ لایەنەكان بۆ پێكھێنانی كابینەی نوێی حكوومەتی ھەرێمی كوردستان دەستپێكردووە، دوێنێ لە سلێمانی لەگەڵ یەكێتی نیشتمانی كوردستان كۆبوونەوە و ئەمڕۆش لەگەڵ بزووتنەوەی گۆڕان كۆدەبنەوە.