نه‌ته‌وه یه‌كگرتووه‌كان ئاماری قوربانیانی مانگی دیسه‌مبه‌ر له عێراق ئاشكرا ده‌كات
K24- هه‌ولێر:
نه‌ته‌وه یه‌كگرتووه‌كان ئاماری قوربانیانی توندوتیژی و كرده‌وه‌ی تیرۆریستییه‌كانی عێراق له مانگی كانوونی یه‌كه‌می ساڵی رابردووی راگه‌یاند.
له به‌یاننامه‌یه‌كی نه‌ته‌وه یه‌كگرتووه‌كاندا ئاماژه به‌وه دراوه، "ته‌نیا له مانگی دیسه‌مبه‌ر/ كانوونی یه‌كه‌می 2018، 32 هاووڵاتی سڤیلی عێراقى له كرده‌وه‌ی تیرۆریستی و توندوتیژی و ناكۆكییه‌كان كوژراون و 32ی دیكه‌ش بریندار بوونه".
به‌یاننامه‌كه ئاشكراشیكرد، "زۆرترین رێژه‌ی قوربانیان له شاری مووسڵ بوون، كه 7 كوژراو 19 برینداری هه‌بوون، دوای ئه‌ویش پارێزگای به‌غدا له پله‌ی دووه‌مدایه و 17 كوژراو و 3 برینداری هه‌بووه، دواتریش پارێزگای سه‌ڵاحه‌دین به كوژرانی 3 كه‌س و بریندار بوونی 3ی دیكه له پله‌ی سێیه‌مدایه".
له درێژه‌ی به‌یاننامه‌ی نه‌ته‌وه یه‌كگرتووه‌كاندا هاتووه، "ئه‌م ئاماره ته‌نیا تایبه‌ته به قوربانیان له ریزه‌كانی سڤیل و جگه له‌م ژماره‌یه‌ش، چه‌ندین كه‌س له ریزه‌كانی هێزه ئه‌منییه‌كان، پۆلیس، سه‌رباز، پاسه‌وانانی دامه‌زراوه‌كان و تیمه‌كانی به‌رگری شارستانیش له‌ماوه‌ی ئه‌و مانگه‌دا بوونه‌ته قوربانی".
H.B