یه‌كێتی و كۆمه‌ڵ هه‌وڵی واژۆكردنی رێككه‌وتنێك ده‌ده‌ن

هێشتا كۆمه‌ڵ نه‌گه‌یشتووه‌ته‌ دوا بڕیار
kurdistan24.net

K24- هه‌ولێر:

یەكێتی نیشتمانی كوردستان ھەوڵی واژۆكردنی رێككەوتنامەیەكی نوێ لەگەڵ كۆمەڵی ئیسلامی دەدات، لەبەرامبەردا كۆمەڵی ئیسلامی لە ئاستی بەرپرسانی باڵادا لاری نەبوونی خۆی بۆ ئەنجامدانی رێككەوتنەكە دەربڕیوە، بەڵام ئەندامێكی سەركردایەتی كۆمەڵ ئاشكرای دەكات، تا ئێستا ھیچ شتێك یەكلا نەبوەتەوە و كۆمەڵ ڕای فەرمی خۆی لەوبارەوە رانه‌گه‌یاندووه‌.

له‌سه‌ر ئه‌م پرسه‌ش، سه‌ڵاح باپیر، كارگێڕی مەڵبەندی سێی یەكێتی ئەمە پشتڕاستدەكاتەوە و لەھەمان كاتدا ئاماژە بەوە دەدات، كە یەكێتی پێیخۆشە كۆمەڵ بێتە نێو حكومەتی نوێوە.

لەبەرامبەريشدا كۆمەڵی ئیسلامی لەسەر زاری بەرپرسانی باڵای حزبەكەی رایانگەیاندووە, بۆ نزیكبوونەوەیان لەگەڵ یەكێتی لارییان نییە، بەڵام ئەوەی كە تا ئێستا بە تەواوی دیار نییە ئەوەیە كە رێێكەوتنی نێوان یەكێتی و كۆمەڵ چ كاریگەرییەك لەسەر پێكھێنانی حكوومەت درووست دەكات.

لەكاتێكيشدا كه‌ یەكێتی بەشداری حكومەت دەكات و كۆمەڵیش ھێشتا بڕیاڕی یەكلاكەرەوەی نەداوە، شوان رابه‌ر، ئەندامی سەركردایەتی كۆمەڵ جه‌خت ده‌كاته‌وه‌، تا ئێستا ھیچ شتێك یەكلا نەبوەتەوە، كەی بە فەرمی داوای رێێكەوتنیان لێكرا ئەوكات كۆمەڵ رای فەرمی خۆی دەردەبڕێت.

لەماوەی ڕابردوودا كۆمەڵ لە ئاستی باڵادا لەگەڵ یەكێتی كۆبوونەوە، ھەفتەی رابردووش دیواری چاوەڕوانییەكان شكا و پارتی لە ئاستی مەكتەبی سیاسی سەردانی كۆمەڵی ئيسلامى كرد، ھەردوولا بە ئاشكرا بە خەڵكیان راگەیاند كە سەردانەكە دۆستانە بووە، بەڵام ئەوەی بە شاراوەیی ھێشتیانەوە پرسی بە شداریكردن و نەكردنی كۆمەڵ بوو لە كابینەی نوێی حكومەتی ھەرێمی كوردستان.

H.B