سه‌رۆك وه‌زیرانی عێراق سه‌ردانی سێ وڵاتی ئه‌وروپی ده‌كات

"گه‌ڕانه‌وه‌ی سه‌قامگیریی بۆ عێراق و بونیادنانه‌وه‌ی ناوچه‌ رزگاركراوه‌كان ته‌وه‌ری سه‌ره‌كی گفتوگۆكانی ده‌بێت"

K24 - هه‌ولێر:

ئه‌مڕۆ دووشه‌ممه‌، 29/4/2019 نووسینگه‌ی عادل عه‌بدولمه‌هدی، سه‌رۆك وه‌زیرانی عێراق، رایگه‌یاند: "رۆژی سێشه‌ممه‌ سه‌رۆك وه‌زیرانی عێراق، سه‌ردانی هۆڵه‌ندا و ئه‌ڵمانیا و فه‌ڕه‌نسا ده‌كات".

به‌گوێره‌ی زانیارییه‌كان، سه‌ردانه‌كه‌ی سه‌رۆك وه‌زیرانی عێراق به‌ هۆڵه‌ندا ده‌ستپێده‌كات و دواتریش ده‌چێته‌ ئه‌ڵمانیا و فه‌ڕه‌نسا و له‌گه‌ڵ سه‌رۆك و سه‌رۆك وه‌زیران و به‌رپرسانی باڵای ئه‌و وڵاتانه‌ كۆده‌بێته‌وه‌".

نووسینگه‌ی سه‌رۆك وه‌زیرانی عێراق ده‌ڵێت: "دیارترین ئه‌و پرسانه‌ی عادل عه‌بدولمه‌هدی له‌گه‌ڵ به‌رپرسانی ئه‌و سێ وڵاته‌ ئه‌وروپییه‌ باسیان ده‌كات، په‌یوه‌سته‌ به‌ گه‌ڕانه‌وه‌ی سه‌قامگیریی بۆ عێراق و بونیادنانه‌وه‌ی ناوچه‌ رزگاركراوه‌كان".