10 تۆن خۆرماى تێكچوو له‌ناوبرا

له‌سه‌ر سكاڵاى هاووڵاتییه‌ك ئاشكرابووه‌

K24 - گه‌رمیان:

نزیكه‌ی 10 تۆن خورمای تێكچوو، له‌لایه‌ن لێژنه‌ هاوبه‌شه‌كانی قائیمقامیه‌تی كه‌لار له‌ عه‌لوه‌ ده‌ستی به‌سه‌ردا گیرا.

به‌ گوێره‌ی راگه‌یه‌ندراوێكی لێژنه‌كه‌، له‌سه‌ر سكاڵای هاووڵاتییه‌ك له‌و بڕه‌ خورما تێكچووه‌ ئاگادار كراونه‌ته‌وه‌ و دوای ئه‌وه‌ی لێژنه‌كه‌یان چوونه‌ته‌ شوێنه‌كه‌ و پشكینینیان بۆ كردووه‌، ده‌ركه‌وتووه‌ خورماكه‌ تێكچووه‌.

وه‌ك له‌ راگه‌یه‌ندراوه‌كه‌دا ئاماژه‌ی بۆ كراوه‌، رێككه‌وتی ده‌رچوون و كۆتاییهاتنی له‌سه‌ر نه‌نووسراوه‌، له‌ پشكنینیش ده‌ركه‌وتووه‌ كه‌ به‌ كه‌ڵكی خواردن نایه‌ت، بۆیه‌ ده‌ستی به‌سه‌ردا گیراوه‌ و به‌ گوێره‌ی رێنماییه‌كانیش له‌ناوی ده‌به‌ن.

ئاماژه‌ به‌وه‌شكراوه‌، لێكۆڵینه‌وه‌كان به‌رده‌وامن و رێكاری پێویستیش به‌رامبه‌ر خاوه‌نی ئه‌و خورمایه‌ ده‌گیرێته‌ به‌ر.

هاوكات لێژنه‌ی باڵای قائیمقامیه‌تی قه‌زای كه‌لار، ده‌ستخۆشی له‌و هاووڵاتییه‌ ده‌كات كه‌ له‌ باره‌ی ئه‌و بڕه‌ خورمایه‌ ئاگاداری كردوونه‌ته‌وه‌ و زانیاری درووستی پێداون، داواش له‌ سه‌رجه‌م هاووڵاتیان ده‌كات له‌ ئه‌گه‌ری تێبنیكردنی هه‌ر سه‌رپێچییه‌ك لێژنه‌كه‌ ئاگادار بكه‌نه‌وه‌. 

ئ. م