سه‌رۆك بارزانی پشتیوانیی خۆی بۆ بنكه‌ی لالش راگه‌یاند
K24 - هه‌ولێر:
له پیرۆزبایینامه‌یه‌كدا بۆ سەرۆك و ئەندامانی دەستەی باڵا، سه‌رۆك بارزانی پشتیوانیی خۆی راده‌گه‌یێنێت و پیرۆزبایی بیست و شەش ساڵەی دامەزراندنی بنكەی لالش، له ئەندام و كادیرانی و سه‌جه‌م ئێزیدییه‌كان ده‌كات و دەستخۆشیی لە هەوڵ و ماندووبوونیان دەكات بۆ كاركردن و پەرەپێدانی چالاكیی كۆمەڵایەتی و كولتووری و خزمەتكردنی خوشك و برایانی ئێزدی.
ئه‌مڕۆ یه‌كشه‌ممه 12/5/2015، سه‌رۆك بارزانی بروسكه‌یه‌كی پیرۆزبایی ئاراسته‌ی سەرۆك و ئەندامانی دەستەی باڵای بنكه‌ی لالش كردووه، هیوای سەركەوتن و بەردەوامیی بۆ خواستوون لە ئەرك و كارەكانیاندا و پشتیوانیی تەواوی خۆی بۆ راگه‌یاندوون.
هه‌روه‌ها ئومێدی ئاسوودەیی و ئارامی و گەڕانەوەی هەموو خوشك و برایانی ئێزدی بۆسەر ژیانی ئاسایی خۆیان دەخوازێت.
ده‌قی په‌یامه‌كه‌ی سه‌رۆك بارزانی
بەناوی خودای بەخشندە و میهرەبان
بەڕێزان سەرۆك و ئەندامانی دەستەی باڵای بنكەی لالش
بەبۆنەی بیست و شەش ساڵەی دامەزراندنی بنكەی لالش پیرۆزبایی لە ئێوەی بەڕێز و ئەندام و كادیرانی بنكەی لالش و هەموو خوشك و برایانی ئێزیدی دەكەم. دەستخۆشی لە هەوڵ و ماندووبوونتان دەكەم بۆ كاركردن و پەرەپێدانی چالاكیی كۆمەڵایەتی و كولتووری و خزمەتكردنی خوشك و برایانی ئێزیدی.
بەم بۆنەوە هیوای سەركەوتن و بەردەوامییتان بۆ دەخوازم لە ئەرك و كارەكانتاندا و پشتیوانیی تەواوی خۆم بۆ ئێوەی بەڕێز ڕادەگەیێنم. ئومێدی ئاسوودەیی و ئارامی و گەڕانەوەی هەموو خوشك و برایانی ئێزیدی بۆسەر ژیانی ئاسایی خۆیان دەخوازم.
هەر سەركەوتوو بن و بمێنن بەخێر و خۆشی
مسعود بارزانی
12/5/2019