رێگه‌نه‌درا ئاواره‌ی كه‌مپه‌كان گله‌ییه‌كانیان بگه‌یه‌ننه وه‌زیری كۆچی عێراق
K24 - مووسڵ:
وەزیری کۆچ و کۆچبەرانی عێراق سەردانی کەمپی حەسەن شامی نزیک مووسڵی کرد، نەوفەل بەها, وەزیری کۆچ و کۆچبەرانی عێراق بە کوردستان24ی گوت پرۆسەی گەڕانەوەی ئاوارەکان دەستپێدەکات و سەرەتای ساڵی داهاتوو ئەنبار دەبێتە یەکەم پارێزگا کە هیچ کەمپێکی تیادا نامێنێت.
دانیشتوانی کەمپەکە گلەیی و توڕەیی زۆریان لە دڵدا بوو، ویستیان بە وەزیرەکەی عێراقی بگەیەنن، بەڵام پاسەوانەکان نەیانهێشت سەرەنجام توڕەیی خەڵك هێندەی دیکە زیاتر بوو.
پیاوێک دەڵێ ناکرێ ئێمە لەم کەمپەدا بمرین ، سەرۆکی لیژنەی کۆچ و کۆچبەرانی پەرلەمانی عێراقیش داوا لە سەرۆک وەزیران دەکات یان کێشەی ئاوارەکان چارەسەر بکات یان دەستلەکاربکێشێتەوە.
نه‌وفه‌ل به‌ها، وه‌زیری كۆچ و كۆچبه‌رانی عێراق، بۆ كوردستان 24 گوتی: " دەمانەوێ ناوی ئاوارەکان تۆمار بکەین بۆ ئەوەی لەمەودوا لە پرۆسەی گەیاندنی هاوکارییەکان و گەڕانەوەیان هاوکارمان بێت، بۆ گەڕنەوەی ئاوارەکان لە ئەنبارەوە دەستپێدەکەین، بەردەوامین لە هاوکارییەکانمان و سوپاسی ڕێکخراوە خۆجێیەکانیش دەکەم، بەڕاستی دەزگای خێرخوازی بارزانی هیچ کەموکوڕی نەبووە، سوپاسی هەرێمی کوردستانیش دەکەم کە لەگەڵیاندا هەماهەنگییەکی باشمان هەیە".
دوو ساڵ بەسەر نەمانی خەلافەتەکەی داعشدا تێپەڕیوە و هێشتا ملیۆنێك و شەشسەد هەزار ئاوارەی ناوخۆیی لە عێراقدا هەن، کە نزیکەی 300 هەزاریان بێ مال و حاڵن، بەرپرسانی عێراقیش جگە لە بەڵێنی گەورە بۆ درووستکردنی دنیایەکی پەمەیی هیچ شتێکیان پێنەکراوە.
ئ. م