ھەواڵی كۆچی دوایی ئیسماعیل خورماڵی رەتدەكرێتەوە
K24 - ھەڵەبجە
بنەماڵەی ئیسماعیل خورماڵی شاعیر دەنگۆی كۆچی دوایی ئیسماعیل خورماڵی رەتدەكەنەوە و رایدەگەیەنن كە باری تەندروستی زۆرباشە و ئەو ھەواڵەی بڵاوبووەتەوە دوورە لە راستیەوە.
سەیوان عوسمان، برازای ئیسماعیل خورماڵی بە كوردستان24ی راگەیاند: "لە چەند كەناڵێك و تۆڕە كۆمەڵایەتییەكان ھەواڵی كۆچی دوایی مامم بڵاوكراوەتەوە، بەڵام ئەوە دوورە لە راستییەوە و ئەمڕۆ پەیوەندیمان پێوە كردووە و تەندروستی زۆر باشە".
ئاماژەی بەوەشكرد: "ئیسماعیل خورماڵی ئێستا لە سلێمانییە و ئەمڕۆ قسەمان لەگەڵ كردووە".
سەبا ئەحمەد، بەڕێوەبەری راگەیاندن و پەیوەندییەكانی بەڕێوەبەرایەتی رۆشنبیری و ھونەری ھەڵەبجە بە كوردستان24ی گوت: "لە ھەندێك شوێن بڵاوكراوەتەوە كە ئیبراھیم برای ئیسماعیل خورماڵی كۆچی دوایی كردووە، بەڵام ئەو ھەواڵەش راست نییە".
ئیسماعیل خورماڵی یەكێكە لە شاعیرە دیارەكانی كورد، خاوەنی چەندین بەرھەمی شیعرییە و شیعرەكانی لەلایەن ژمارەیەك لە گۆرانیبێژانەوە كراون بە گۆرانی.
ھ.م