ئێران بۆ سێیه‌مجار له‌گه‌ڵ پارته كوردییه‌كانی رۆژهه‌ڵات كۆده‌بێته‌وه
K24 - هه‌ولێر:
بڕیاره مانگی داهاتوو له نه‌رویج بۆ سێیه‌مجار ئێران له‌گه‌ڵ پارته كوردییه‌كانى رۆژهه‌ڵاتی كوردستان كۆببێته‌وه.
به‌گوێره‌ی راپۆرتێكی ماڵپه‌ڕی ئه‌لمۆنیتۆرى ئه‌مریكی، بڕیاره مانگی داهاتوو، له شاری ئۆسلۆی پایته‌ختی نه‌رویج، ئێران بۆ جاری سێیه‌م له‌گه‌ڵ پارته ئۆپۆزسیۆنه كورده‌كان كۆببێته‌وه.
ئه‌و ماڵپه‌ڕه ئه‌مریكییه ئاشكراى كردووه، سه‌نته‌ری "سینك تانكی" نه‌رویجی نۆریف، سه‌رپه‌رشتی ئه‌و گفتوگۆیانه ده‌كات و رێكیخستوون.
ئه‌لمۆنیتۆر ئاشكرای كردووه كه چوار پارتی كوردی به‌شداری گفتوگۆكان بوون و به‌رپرسی یه‌كێك له‌و پارتانه‌ش رایگه‌یاندووه, ئه‌و كۆبوونه‌وانه ته‌نیا گفتوگۆن و نابێت به رێككه‌وتن ته‌ماشا بكرێن.
ماڵپه‌ڕه‌كه ئاشكرای كردووه، دووجاری دیكه ئێران و حزبه كوردییه‌كان له مانگی ئایار و حوزه‌یرانی رابردوو له نه‌رویج كۆبوونه‌ته‌وه.
به گوێره‌ی ئه‌لمۆنیتۆر، نوێنه‌رانی هه‌ر چوار حزبه كوردییه‌كه، كه قسه‌یان بۆ سایته‌كه كردووه، ره‌تیانكردووه‌ته‌وه له‌لایه‌ن ئه‌مه‌ریكییه‌كانه‌وه په‌یوه‌ندییان پێوه‌كرابێت بۆ ئه‌وه‌ی له دژی ئێران هه‌ماهه‌نگی بكه‌ن.
له باره‌ی گفتوگۆكان و هه‌ڵوێستی ئێرانیش، به‌رپرسی یه‌كێكی له‌و چوار حزبه رایگه‌یاندووه، هه‌ر كاتێك تاران هه‌ست به هه‌ڕه‌شه و مه‌ترسی بكات، گفتوگۆ له‌گه‌ڵ حزبه كوردییه‌كان ده‌كات، بۆ ئه‌وه‌ش گفتوگۆكانی ساڵانی 1989 دوای شه‌ڕی هه‌شت ساڵه‌ی عێراق و ئێران و هاتنی ئه‌مه‌ریكا له ساڵی 2003 به نموونه هێنایه‌وه.
ئ. م