چه‌ند گوللـه هاوه‌نێك ئاراسته‌ی گوندی تۆپزاوی کاکەیی كرا
K24 - كه‌ركووك:
ڕەجەب عاسی کاکەیی چالاکوانی كاكه‌یی و دانیشتووی سنووری قه‌زای داقووق، بە کودستان 24ی راگه‌یاند، زیاتر لە 10 گوللـه هاوەن ئاراستەی گوندی تۆپزاوە کراوە.
ئه‌و چالاكوانه كاكه‌ییه راشیگه‌یاند، وه‌ك باس ده‌كرێت، سەرچاوەی هاوەنەکان چەکدارانی داعشن و شه‌وی رابردووش گوندێكی دیكه‌ی سنووره‌كه‌یان هاوه‌نباران كردووه.
گوتیشی: "تا ئێستا زیانە گیانییەکان نەزانراوە، بەڵام زیان بەو ماڵانە گەیشتووە کە لەو گوندەن".
بەوتەی ئەو چالاکوانە، ئێستا دوای هاوەنبارانکردنی گوندەکە، تەقە ئاراستەی گوندەکە کراوە و سەرچاوەکەی دیار نییە.
شه‌وی رابردووش، چوار گوللـه هاوه‌ن ئاراسته‌ی گوندی دارای حه‌فته‌غاری سه‌ر به قه‌زای داقووق كرا و به‌هۆیه‌وه 3 ئه‌ندامی یه‌ك خێزان برینداربوون.
ماوه‌یه‌كه جموجۆڵ و مه‌ترسییه‌كانی چه‌كدارانی داعش، به روونی له سنووری پارێزگاكانی نه‌ینه‌وا، ئه‌نبار، سه‌ڵاحه‌ددین و دیاله ده‌ركه‌وتووه و ژماره‌ی كرده‌وه تیرۆریستییه‌كانیان زیادیكردووه.
ئ. م