ئه‌و دوو منداڵه‌ی هه‌ڕه‌شه‌ی كوشتنیان له‌سه‌ر بوو رزگاركران

له‌لایه‌ك باوك و زڕدایكیانه‌وه‌ هه‌ڕه‌شه‌ی كوشتن و سووتاندنیان لێكرابوو

K24 - هه‌ولێر:

دوو منداڵ، كه‌ له‌لایه‌ن باوك و زڕدایكیان هه‌ڕه‌شه‌ی كوشتن و سووتاندنیان لێكرابوو، له‌لایه‌ن به‌ڕێوه‌به‌رایه‌تی خانه‌ی نه‌وجه‌وانانی هه‌ولێر رزگار كران.

وه‌زاره‌تی كار و كاروباری كۆمه‌ڵایه‌تی حكوومه‌تی هه‌رێمی كوردستان، له‌ په‌یجی فه‌رمی خۆی له‌ تۆڕی كۆمه‌ڵایه‌تی فه‌یسبووك بڵاویكردووه‌ته‌وه‌، شێخ زه‌یتۆ، به‌ڕێوه‌به‌ری خانه‌ی نه‌وجه‌وانان رایگه‌یاندووه‌، كه‌ له‌سه‌ر راسپارده‌ی كوێستان محه‌مه‌د، وه‌زیری كار و كاروباری كۆمه‌ڵایه‌تی، دوو منداڵه‌كه‌ رزگاركراون.

ئاماژه‌ به‌وه‌شكراوه‌، پێشتر ئه‌و دوو منداڵه‌ له‌ خانه‌ی نه‌وجه‌وانان بوونه‌، به‌ڵام دوای ئه‌وه‌ی باوكیان هاوسه‌رگیری كردووه‌ته‌وه‌، ئه‌وانیش متمانه‌یان پێكردووه‌ و منداڵه‌كانی پێداوه‌ته‌وه‌، به‌ڵام دوای ماوه‌یه‌ك باوكه‌كه‌ و زڕدایكه‌كه‌ بوونه‌ته‌ مۆته‌كه‌ی گیانی منداڵه‌كان، تا كار گه‌یشتووه‌ته‌ ئه‌وه‌ی له‌ ماڵه‌وه‌ ده‌ریان بكه‌ن و هه‌ڕه‌شه‌ی كوشتن و سووتاندنیان لێ بكه‌ن.

وه‌ك له‌ وێنه‌كانیش ده‌رده‌كه‌وێت، دوو منداڵه‌كه‌ له‌ ماڵه‌وه‌ ده‌ركراون و یه‌كێكیان شوێنه‌واری ئه‌شكه‌نجه‌ و سووتان به‌سه‌ر ده‌ستییه‌وه‌ دیاره‌.

ئاماژه‌ به‌وه‌شكراوه‌، دوای پشكنینی پزیشكی و چاره‌سه‌ری سه‌ره‌تایی، ئێستا هه‌ردوو منداڵه‌كه‌، كه‌ كوڕن، له‌ خانه‌ی نه‌وجه‌وانانی هه‌ولێر پارێزراون و ته‌ندرووستیشیان جێگیره‌.

وێنه‌ی دوو منداڵه‌كه‌ له‌ خانه‌ی نه‌وجه‌وانانی هه‌ولێر  دوای رزگاركردنیان - فۆتۆ: وه‌زاره‌تی كار
وێنه‌ی دوو منداڵه‌كه‌ له‌ خانه‌ی نه‌وجه‌وانانی هه‌ولێر دوای رزگاركردنیان - فۆتۆ: وه‌زاره‌تی كار

ئ. م