كچە کوردێک خەڵاتی ڤیڤا بەدەستدەهێنێت
K24 - بەرلین
نەوەی نوێی کوردانی ئەڵمانیا توانیویانە خۆیان لەگەڵ کۆمەڵگای ئەڵمانیدا بگونجێنن و لە ناوەندە ھونەری و ئەکادیمیەکاندا جێبگرن و سەرکەوتن بەدەستبھێنن. یەکێک لەو کەسانە کچێکی کوردی خەڵکی شاری دێرسمی باکووری کوردستانە و لە ئەڵمانیا لەدایکبووە، ئەو کچە بەھۆی کارە ھونەرییەکانی توانیویەتی خەڵاتێکی ھونەری لە ئەڵمانیا بەدەستبھێنێت.
کچە کوردێک خەڵاتی (ڤیڤا ئارس- Viva Ars )ی بۆ ساڵی 2020 بەدەستھێناوە، کە ئەو خەڵاتە لە ئەڵمانیا ساڵانە دەدرێتە ھونەرمەندە گەنجە سەرکەوتووەکان.
ئەو ھونەرمەندە ناوی جەمیلە شاھینە و لە رێگەی تێکست و وێنە و چیرۆک کار لەسەر نووسراوە مێژووییەکان دەکات.
شاهین لە بواری ئەدەبیشدا ئەمساڵ کتێبێک بڵاودەکاتەوە بە ناونیشانی تەکسی، ئەو کتێبە باس لە چیرۆکی ژنێک دەکات کە کوڕەکەی لە شەڕدا کوژراوە و دایکەکە نایەوێت مردنی کوڕەکەی قبووڵ بکات.
جەمیلە شاھین، خەڵکی شاری دێرسمی باکووری کوردستانە و لە ئەڵمانیا لەدایکبووە، ماستەری لە ھونەرە جوانەکان لە بەرلین و لەندەن بەدەستھێناوە. یەکێکە لەو ھونەرمەند و نووسەرە کوردانەی ئەڵمانیا کە توانیویەتی لە ناو ھونەر و ئەدەبی ئەڵمانیدا رۆڵی خۆی ببینێت.
ھ.م