به‌هۆی لێدانی هه‌وره‌برووسكه‌ گه‌نجێك گیانی له‌ده‌ستدا

یه‌كێكی دیكه‌ش برینداره‌

K24 - هه‌ڵه‌بجه‌:

به‌هۆی لێدانی هه‌وره‌برووسكه‌، له‌ سنووری گونده‌كانی نه‌وڕۆڵی سه‌ر به‌ ناحیه‌ی سیروان له‌ پارێزگای هه‌ڵه‌بجه‌، ئه‌مڕۆ شه‌ممه‌، 19ی تشیرینی یه‌كه‌م/ ئۆكتۆبه‌ری 2019، گه‌نجێكی ته‌مه‌نی 24 ساڵ، به‌ناوی (ئاران ئه‌ركان) گیانی له‌ده‌ستدا و یه‌كێكی دیكه‌ش برینداربوو.

به‌ گوێره‌ی زانیارییه‌كان، (ئاران) دانیشتووی گه‌ڕه‌كی فه‌رمانبه‌رانی پارێزگای هه‌ڵه‌بجه‌یه‌ و پیشه‌ی قوتابییه‌، كوڕی (مامۆستا ئه‌ركان)ی قائیمقامی پێشووی هه‌ڵه‌بجه‌یه‌.

رائید بارزانی عوسمان، گوته‌بێژی پۆلیسی هه‌ڵه‌بجه‌ رایگه‌یاند، ئێستاش ته‌رمی ئاران گوازراوه‌ته‌ پزیشكی دادی هه‌ڵه‌بجه‌ و برینداره‌كه‌ش بۆ وه‌رگرتنی چاره‌سه‌ر ره‌وانه‌ی فریاكه‌وتنی هه‌ڵه‌بجه‌ كراوه‌.

ئاماژه‌ی به‌وه‌ش كرد، هه‌ردوو گه‌نجه‌كه‌ پوورزای یه‌كدین، ئێستاش په‌ڕاوی لێكۆڵینه‌وه‌ بۆ رووداوه‌كه‌ كراوه‌ته‌وه‌.

ئ. م