داھاتووی رۆژئاوای كوردستان لەنێوان رێككەوتنی وڵاتان دیار نییە
K24 - قامیشلو
پارتەكانی رۆژئاوای كوردستان دەڵێن، دۆخی رۆژئاوای كوردستان بە شێوەیەك ئاڵۆز و ناڕوونە كە تائێستا لەنێوان رێككەوتنەكانی وڵاتانی زلھێز داھاتووی كورد دیار نییە و نازانن رێككەوتنەكان لەسەر چی كراون و داھاتووی كورد لە رۆژئاوای كوردستان و ناوچەكە چۆن دەبێت.
لەبارەی رێككەوتنی نێوان رووسیا و توركیا، مەزڵوم عەبدی فەرماندەی ھێزەكانی سووریای دیموكرات (ھەسەدە) دەڵێ "تێبینیمان لەسەر رێككەوتنەكە ھەیە و قبوڵمان نەكردووە".
موحسین تاھیر ئەندامی مەكتەبی سیاسی پارتی دیموكراتی كوردستان - سووریا، بە كوردستان24ی راگەیاند: "لێدوانەكانی مەزڵوم عەبدی بە دەنگێكی زوڵاڵ نییە و پێویستە كورد لە رێگەی بڕیاری سیاسیی و بڕیارە نێودەوڵەتییەكان مافی خۆی وەرگرێت".
پەیوەست بەو پرسە تەلال محەمەد سكرتێری پارتی ئاشتی دیموكراتی كورد لە سووریا دەڵێت: "تائێستا سوپای توركیا و میلیشیاكان شەڕیان دژی ھەسەدە نەوەستاندووە، ھەسەدەش ترسی ھەیە لە كشانەوە، كاتێك ئەوان بكشێنەوە كێ خەڵك دەپارێزێت؟، بۆیە پێویستە رووسیا گەرەنتی پاراستنی ھاووڵاتییانی كورد بدات".
ھ.م