سبه‌ی هاوپه‌یمانی نێوده‌وڵه‌تی باسی هه‌سه‌ده ده‌كات
پلانی توركیا و رووسیا و دیمه‌شق له رۆژئاوای كوردستان تاوتوێ ده‌كه‌ن
.jpg)
K24 – هه‌ولێر:
وه‌زاره‌تی ده‌ره‌وه‌ی ئه‌مه‌ریكا، رایگه‌یاند، له كۆبوونه‌وه‌ی وه‌زیرانی ده‌ره‌وه‌ی وڵاتانی "هاوپه‌یمانی نێوده‌وڵه‌تی دژی داعش"، بابه‌تی رێككاره‌كانی رووسیا، توركیا و حكومه‌تی سووریا له باكووری خۆرهه‌ڵاتی سووریا و په‌یوه‌ندییه‌كانمان له‌گه‌ڵ هه‌سه‌ده تاوتوێ ده‌كه‌ن.
به‌رپرسێكی باڵای وه‌زاره‌تی ده‌ره‌وه‌ی ئه‌مه‌ریكا، بێ ئه‌وه‌ی ناوی بهێنرێت، به رۆژنامه‌نووسانی رایگه‌یاند، "سبه‌ی پێنجشه‌ممه (14ی تشرینی دووه‌م/ نۆڤێمبه‌ری 2019)، وه‌زیر و نوێنه‌رانی 35 وڵاتی ئه‌ندامی هاوپه‌یمانی نێوده‌وڵه‌تی دژی داعش، له واشنتن كۆده‌بنه‌وه".
گوتیشی: "له‌و كۆبوونه‌وه‌یه‌دا باس له پێشهاته‌كانی ره‌وشی سووریا و شه‌ڕی تیرۆر ده‌كرێت، به تایبه‌تیش پرسی هێرشه‌كانی سوپای توركیا بۆ سه‌ر باكووری سووریا".
هه‌روه‌ها گوتی: "هه‌ڵوێستی وڵاتانی هاوپه‌یمان له باره‌ی هاوبه‌شه‌كانمان له هێزه‌كانی سووریای دیموكرات(هه‌سه‌ده) له شه‌ڕی دژ به داعش و هه‌نگاوه‌كانی داهاتووی ئه‌مه‌ریكا له باكووری سووریا تاوتوێ ده‌كرێن".
روونیشیكرده‌وه، "پێش كۆبوونه‌وه‌ی فراوانی هاوپه‌یمانییه‌كه، كۆبوونه‌وه‌یه‌كی دیكه‌ی بچووككراوه ده‌كرێت، كه وڵاتانی (بریتانیا، ئه‌ڵمانیا، میسر، ئه‌رده‌ن، سعوودییه، ئه‌مه‌ریكا و فه‌ره‌نسا) به‌شداری تێدا ده‌كه‌ن و له میانه‌یدا باس له ره‌وشی سووریا و تێڕوانینیان بۆ ده‌ستپێكردنی پرۆسه‌ی سیاسی و ره‌وشی ئه‌منی و سه‌ربازی سووریا ده‌كرێت".
سه‌رچاوه: RT
ئ.ر