كارێز باس له هۆكاری گریانه‌كه‌ی ده‌كات له كاتی گوێگرتن له وه‌ڵامه‌كه‌ی سیسی
K24 - هه‌ولێر:
ئەو كچە كوردەی لە كۆڕبەندی لاوانی جیھان لە شەرم لشێخ بەشداری كردبوو و و سەبارەت بە ناسنامەی كورد پرسیاری لە سەرۆكی میسر كرد، گەڕاوەته‌وه شاری ھەولێر و باسی ئەو كۆربەندە و بەشداریكردنی و ئەو پرسیارە دەكات.
كارێز دەرگەڵەیی تەمەنی 23 ساڵ، دەرچووی بەشی ئەندازیاری نەوتە لە زانكۆی سۆران و ئێستاش قوتابی ماستەرە، باس له‌وه ده‌كات، پرسیارەكەی دەنگدانەوەی زۆرى هه‌بووە لە دنیای دەرەوە و باسی ھۆكاری گریانەكەی دەكات لە كاتی وەڵامەی سەرۆكی میسر.
داواكاریشە لە ھەموو گەنجان كاتێ بەشداری كۆڕێكی جیھانی دەكەن بە ناوی ھەموو كوردان قسە بكەن و تەنیا خەمخۆری پارچەیەكی كوردستان نەبن.
كارێز ئاماژه به‌وه‌ش دەكات، كه پرسیارەكەی لەو كۆڕبەندە جیاواز بووە لە پسپۆرییه‌كه‌ی، بەڵام لە بنەماڵەیەكی كورد پەروەر گەورە بووە و ھەر ئەمەش وایكردووە زیاتر بە دواداچوونی بۆ كورد و كوردستان هه‌بێت.
لە سێیەمین كۆڕبەندی لاوانی جیھان لە میسر، كه راستەوخۆ بە سه‌رپه‌رشتی سەرۆكی میسر بەڕێوەچوو ، ئەمساڵ 7 ھەزار گەنج لە سەرتاسەری جیھان بەشدارییان كرد و 15 كەس لە كوردستان لەم كۆڕبەندە ئامادە بوون، بەڵام بۆ پرسیار و وەڵام كارێز توانی وەك كچە كوردێك سەبارەت بە ناسنامەی كورد پرسیار له عه‌بدولفه‌تاح سیسی سه‌رۆكی میسر بكات و سەرۆكی میسریش، باسی زمان و كولتووری كوردی كردو وتی كەس ناتوانێ ناسنامە كورد بسڕێتەوە.
كارێزیش ھیواخوازە ھەر گەنجێكی كورد به‌شداری كۆڕبەندە جیھانییەكان ده‌كات، خەمخۆری ھەر 4 پارچەی كوردستان بێت.