مه‌زڵوم كوبانێ: قسه‌كانی لاڤرۆڤ ورد و راست نین
K24 – هه‌ولێر:
فه‌رمانده‌ی هێزه‌كانی سووریای دیموكرات (هه‌سه‌ده)، مه‌زڵوم كوبانێ، رایگه‌یاند، هه‌ماهه‌نگییه‌كی نیمچه رۆژانه له نێوان "هه‌سه‌ده" و هێزه‌كانی هاوپه‌یمانی نێوده‌وڵه‌تی دژی داعش به سه‌رۆكایه‌تی ئه‌مه‌ریكا له لایه‌ك و رووسیا له لایه‌كی دیكه‌وه هه‌یه، به تایبه‌ت له باره‌ی چاره‌نووسی ده‌ستگیركراوه‌كانی داعش.
له تویتێكدا، "مه‌زڵوم كوبانێ" نووسیویه‌تی: سه‌ركه‌وتوو بووین له ئیداره‌دانی ئه‌و دۆسییه‌یه و پاراستنی ئاسایش و ئاشتی ناوچه‌كه و جیهان، سه‌ره‌ڕای ئه‌م توانا سنوورداره‌ی هه‌مانه و ئه‌و هه‌ڕه‌شانه‌ی له توركیاوه هه‌ن بۆ سه‌ر سه‌لامه‌تی و ئاسایشی زیندانه‌كانمان.
هه‌روه‌ها نووسیویه‌تی: ئه‌و راپۆرتانه‌ی وه‌زیری ده‌ره‌وه‌ی رووسیا، "سێرگی لاڤرۆڤ" باسیان ده‌كات، ورد و له‌جێی خۆیاندا نین.
پێشتر وه‌زیری ده‌ره‌وه‌ی رووسیا، رایگه‌یاندبوو، له زیندانه‌كانی هه‌سه‌ده‌دا ده‌ستگیركراوانی داعش راده‌كه‌ن.
هه‌روه‌ها گوتبووی: مۆسكۆ له‌و ده‌نگۆیانه ده‌كۆڵێته‌وه، كه باس له‌وه ده‌كه‌ن، هه‌سه‌ده له به‌رامبه‌ر پاره‌دا ده‌ستگیركراوانی داعش ئازاد ده‌كات.