لە شاری هەولێر و قەزاو ناحیەكانی هاتوچۆی پیادەش قەدەغە كرا
K24- هەولێر:
ژووری ئۆپەراسیۆنی بەرەنگاربوونەوەی ڤایرۆسی کۆرۆنای پارێزگای هەولێر بە سەرپەرشتی فرسەت سۆفی، پارێزگاری ئەو شارە كۆبووەوە و دوای كۆبوونەكەش لە راگەیەندراوێكدا چەند رێكارێكی نوێی لە سنووری پارێزگاكە راگەیاند، گرنگترینیان ئەوە بوو كە هاتوچۆی پیادەش قەدەغە كرا.
دەقی راگەیەندراوەكە:
دوای بڕیاری وەزارەتی ناوخۆی حکومەتی هەرێمی کوردستان بە دریژکردنەوەی قەدەغەکردنی هاتووچۆ تاوەکو 2020/4/1، ئەمشەو ژووری ئۆپەراسیۆنی بەرەنگاربوونەوەی ڤایرۆسی کۆرۆنا، بەسەرپەرشتی فرسەت سۆفی، پارێزگاری هەولێر، کۆبوونەوەیەکی ئەنجامدا.
کۆبوونەوە بڕیاریدا:-
1- جگە لە قەدەغەکردنی هاتووچۆی ئۆتۆمۆبێل، هاتوو چۆی پیادەش لەسەر جەم کۆڵانەکانی قەزا و ناحییەکان و ناوەندی شاری هەولێر قەدەغەیە، تەنها بۆ حاڵەتی کڕینی خوراك و پێویستی زۆر زەرور نەبێ، هیچ کەسێكی دیكە ڕێگەپێدراو نییە، بۆ ئەو مەبەستە تەواوی هێزە ئەمنییەکان بڵاوەیان پێکراوە، هەرکەسێك سەرپێچی ئەم بڕیارە بکات، رووبەڕووی لێپێچینەوەی یاسایی دەبێتەوە.
2- سەرجەم مارکێت و سەمونخانە و نانەواخانەکان، ئەو شوێنانەی ڕێگەی کارکردنیان پێدراوە، پابەندنی تەواوی ڕێنماییە تەندروستییەکان نەبن، لێپێچینەوەیان لەگەڵدا دەکرێت و دادەخرێن.
داواکارین لە تەواوی هاوڵاتیانی سنووری پارێزگای هەولێر، پابەندبن بە بڕیاری قەدەغەکردنی هاتووچۆ و ڕێنماییە تەندروستیەکان جێ بەجێ بکەن و لەماڵەکانیان بمێنەوە.
ژووری ئۆپەراسیۆنی بەرەنگاربوونەوەی ڤایرۆسی کۆرۆنای پارێزگای هەولێر
2020/3/23
H.B