ژێردەستەیی بەناو فیدراڵ ..بارو باجت چەند گران و تام وچێژت چەندە تاڵ!
بەدرێژایی ئەو هەزار ساڵەی ئایینی ئیسلام تێیدا بۆتە ئایینی باڵادەست لە کوردستاندا، بەسەدان زانای کورد، جۆرێک خۆیان بۆ خزمەتی کەلتوور و مێژووی ئیسلام و زمانی عەرەبی تەرخانکردووە، تەنانەت هەندێکیان نەپەرژاونەتە سەر خزمەتکردنی زمان و ئەدەب و مێژووی میللەت و نیشتمانەکەی خۆیان. بەشێکی زۆری پیاهەڵدان بە زمانی عەرەبی و پەرتوکخانەی عەرەبی، شانازییەکەیان بەو زانا موسڵمانە بەڕەچەڵەک غەیرە عەرەبانە دەبڕێت کە زۆرینەیان کوردنەژاد بوون، بە نموونە ( ابن خلکان، ابن تیمیة، سعید نورسي، ابن الاثیر، زەریاب، الدینوري، ابراهیم الموصلي، اسحاق الموصلي، ابن فضلان، ابن شداد ، ابن الندیم، عبدالرحمن الکواکبي، أحمد شوقي وجميل صدقي الزهاوي ومعروف الرصافي، مەلا عەبدولکەریمی مودەریس، دکتۆر کامل بەسیڕو دەیان و دەیانی تر ... ). لەبەرامبەر ئەو جوامێری وچاکەیەی کورددا هەندێ زاناو گەڕیدەو مێژوونووسی ناوداری عەرەب، ڕەچەڵەکی کوردیان بردۆتەوە سەر جنۆکە. لەباشترین دۆخیشدا کوردیان بە ( اکراد ) ناوبردووەو نەئەوساو نە ئێستاش هیچ منەتیان بەو خزمەتانەی کورد نەبووە. لەکۆنەوە تا بە ئەمڕۆ دەگات، گەلێ خوێندەوار و زانای کورد بەشدارێکی چالاکی خۆنەویستی بونیادنانی شارستانییەتیی ئیسلامی و عەرەبی بوون، لە بەرامبەریشدا سەرەڕای کۆمەڵکوژی و ڕاگواستن و پیادەکردنی سیاسەتی سوتماکە خاک، زۆرینەی عەرەبی موسڵمانیش بە زاناو نەزانیانەوە، بە زاڵم و زوڵملێکراویانەوە، بە شیعە و سوننەیانەوە، بەتایبەتی لە عێراقدا، نەیاری سەرسەختی زمان ومێژوو کەلتورو ماف و سەروەریی کوردن، گۆشکراوی فەرهەنگێکی لووتبەرزو خۆ بە مەزن زان و ئەوانیتر بە کەم زان و بەهیچ نەزانن. تەنانەت ئەو کاتانەی کە لەسەر خاک و ناوماڵی کورداندا ئاوارەن یان میوانن، هەر بە لووتبەرزی و لەخۆڕازیبوونێکی بەتاڵەوە، بەدەنگی بەرز هاواردەکەن و دەدوێن، بەمانگ و بەساڵ لەناو کورداندا دەژین، کەچی ئەو فەرهەنگی لووتبەرزییە ڕێیاننادات لە کاکە و وەرەو بڕۆ زیاتر فێرببن!
کە ناچاریی تینیان بۆ دێنێ و ئیشیان دەکەوێتە لای ئێمە، (کورد) دەبێتە براو هاوبەشی وڵات، کوردستانیش دەبێتە ئیقلیم. هەر کە ئیشیان ڕایی دەبێ و کاریان پێمان نامێنێ، دەبینەوە بە (ئەکراد)و کوردستانیش، دەبێتەوە بە (شمال الوطن) . پێشتر بەدرێژایی هەشتا ساڵ زمانی کوردیان دەبڕی، ئێستا تێگەیشتوون (زمان) هەرچی زیاتر بیبڕیت تیژتر و درێژتر سەرهەڵدەداتەوە، دەستیان داوەتە تەکنیکێکی نوێی سڕکردن و قڕکردن، بوودجە و مووچەمان دەبڕن !
میدیاکارێکی عەرەبی عێراقی، نوێنەرایەتیی کەناڵێکی ئاسمانیی گەورەو گران دەکات، بەهەڵەداوان خۆی گەیاندۆتە ئۆفیسی پزیشکێکی لاوی کورد، کە هەموو خوێندن و مامەڵەو کاروباری ئیداری و زانستیی ڕۆژانەی ئۆفیسەکەی بە هەردوو زمانی کوردی و ئینگلیزی ڕاییدەکات و ساڵی جارێکیش ئیشی بە زمانی عەرەبی نابێت . ئەم میدیاکارە عەرەبە کە بەدڵنیاییەوە کوردی نازانێ، پێویست بوو بەلای کەمەوە زمانی ئینگلیزی بزانێ ئینجا پڕکێشی بکات و دیدار لەگەڵ پزیشکێکی کورددا بکات. بەڵام دیارە کە هەڕی لە بڕی ناکاتەوە و بە عەرەبییەکی بازاڕیی پرسیاردەکات و خێرا خێرا لە بریی ( کۆرۆنا ) دەڵێت (کەرۆنا ، کەرۆنا ) ! پزیشکە کوردەکەیش بەو چوار وشە عەرەبییەی لەیادی ماوە، بە ڕوویەکی گەشەوە وەڵام دەداتەوەو مەبەستی خۆی دەپێکێت. دواتر لە لە فەرهەنگی عەرەبی عێراقیی لووتبەرزو لە سۆشیال میدیای بەلەسەبووی عێراقیدا، ناڕێکیی عەرەبییەکەی ئەم پزیشکە کوردە، ئینگلیزی زانە، کە هیچ ناچار نیە بە عەرەبی بدوێت، دەبێتە مایەی گاڵتەجاڕی و بێ ئەدەبی، بەڵام دەبەنگی و بێ ئاگایی و کوردی و ئینگلیزی نەزانینی میدیاکاری کەناڵە ئاسمانیە عەرەبیە عێراقییەکە، دەبێتە مایەی شانازی و خۆ گیڤکردنەوە !!
ئای ژێردەستەیی بارو باجت چەندە قورس و تام وچێژت چەندە تاڵە!؟
وای سەردەستەیی و داگیرکاری ، ئێسک و ڕەززات چەند گرانە!؟
ڕووی ژێردەستەیی ڕەشبێ، ئەگەر نا، لەناو ٣٠ ملیۆن عەرەبی عێراق دا، چەند کەس شکدەبەن بتوانێ بە کوردییەکی شەقوشڕیش بێ پێنج خولەک بدوێت؟
زمانی عەرەبی بەلای منەوە زمانێکی زۆر شیرین و باڵایە ! بۆیە هەرگیز نامەوێ و نەمویستووە، بە زەبری زەمانە بۆ مرۆڤی کورد ببێتە زمانێکی ژەهرین و بەڵا! بەندە شارەزاییەکی ئەوتۆم لە زمانی ئەدەبی و میدیایی و فیکریی عەرەبیدا هەیە کە لەخۆم ڕادەبینم سەدان لاپەڕەی پێبنووسم و چەندین کاتژمێر پێی بدوێم، بەڵام هەرگیز زمانی دایکم، زمانی خانی و نالی و مەحوی، زمانی گۆران و باوکم زمانی شێرکۆ و شوکر مستەفا ..... ناکەمە قوربانی هیچ زمانێکی تر !
ڕووی دەمم لە بەرپرسانی باڵای حکومەتی کوردستانەو داوایان لێدەکەم : چیتر زمانی شیرینی کوردی نەکەن بەقوربانی لەڕوودامان بۆ دەرکەوتنێکی تەلەڤیزیۆنی. زمانی ئێمە شوناسی ئێمەیە. بەبێ زمانی کوردی، کوردیش بوونی نیە ! هەرکەس و هەر نوێنەرو هەر میدیاکارو کەناڵێک دێنە لاتان، ئامادەبوونی وەرگێڕی کوردیزانی، زمانزان، بکەنە پێشمەرج، تەنیا بە کوردی لێدوان بدەن و گفتوگۆ بکەن! ئەوەی بەدڵییەتی بەخێربێت سەرچاو .. خۆ ئەگەر نا ، با تێر تێر ... ئاوی سارد بخواتەوە !.