عێراق؛ ئەو پرۆژانەی ملیاران دیناریان تێدا خەرج دەکرێت کوالێتییان خراپە
بڵاوبونەوەی دیمەنی هەرەسهێنانی بەشێک لە پردی نوێی تۆپچی لە بەغدا, کاردانەوەی هاووڵاتیانی لێ کەوتەوە، هاووڵاتیانی بەغدا دەپرسن پردی تۆپچی هێشتا دروستکردنەکەی تەواو نەبووە بەشێکی داڕمان، ئاخۆ بە چ کوالێتییەکەی خراپ دروست کراوە.
هاوکات، چاودێران باس لەوە دەکەن: "پێدانی پرۆژە لە عێراق لەسەر بنەمای پیشەیبوون و ئەزموونی کۆمپانیاکان نییە، بەڵکو لەسەر بنەمای نزیکی ئەو کۆمپانیایانەیە لە بەرپرسانەوە".
بە نایلۆنێکی شین، هەوڵی شاردنەوەی هەرەسهێنانی بەشێک لە پرۆژەی پردی نوێی تۆپچی دەدەن و ناوچەکەیان گەمارۆ داوە، بەڵام ئەم چاوبەستە سەرناگرێت، تاکە ڕێگەی چاککردنەوەی، دروستکردنی پایەیەکە بۆ پردەکە لەجێگەی ئەو پایەیەی بەهۆی کەوتنی قاڵبێکەوە هەرەسی هێنا.
ئەمە نمونەیەکە لەسەر ئەو پرۆژانەی ملیاران دیناریان بۆ خەرج دەکرێت و کوالێتییەکانیشیان بەم شێوەیە و زوو هەرەس دەهێنن.
هاووڵاتیەکی شاری بەغدا بە کوردستان24 دەڵێت: "ئەو پردانە ملیاران دیناریان بۆ خەرج دەکرێت پێویستە کوالێتییەکانیشیان شایەنی ئەو پارە زۆرە بێت. هەندێک پرد هەیە دوای چەند ڕۆژێک لە کردنەوەیان بە ڕووی خەڵک دەبینیت نۆژەنی دەکەنەوە. تووشی هێدمە بووین کە لە فەیسبووک پردی تۆپچیمان بینی هەرەسی هێناوە".
هاووڵاتییەکی دیکەش دەڵێت: "پرۆژەکان و دەستکەوتەکان کە دروست دەکرێن، هیچ بەپێی پێوەرەکانی کاری پیشەیی و کوالێتی نین، بەڵکو زۆرینە لە پێناو بانگەشەی هەڵبژاردن، یاخود لێدانە لە لایەنێکی سیاسی لەلایەن لایەنێکی دیکەوە".
پسپۆڕانی بواری ئابووریش دەڵێن: "پێدانی ئەو پرۆژانە سوودی بۆ کۆمپانیاکانی تیدایە وەک لەخەڵک، ئەمەش نیشانەی پرسیاری گەورەی لەسەر ئەو کۆمپانیانە دروست کردووە کە پرۆژەی هاوشێوەی پردی تۆپچی دروست دەکەن".
لای خۆیەوە جەلیل لامی، پسپۆڕی ئابووری ڕایگەیاند: "پێویستە ئەو کۆمپانیایەی پرۆژەی پێ دەدرێت توانا و لێوەشاوەیی هەبێت، هەروەها پێدانی پرۆژەکان لەسەر بنەمای پیشەیی بوون و ئەزموونی ئەو کۆمپانیایە بێت لە دروستکردنی پرۆژەی هاوشێوە. هەرەسهێنانی پردەکان و پرۆژەکان کاریگەری نەرێنی لەسەر کۆمپانیای جێبەجێکار دروست دەکات".
ئەوەی بەلای هاووڵاتیانەوە سەیر و جێگەی پرسیارە، ڕووخاندنی پردی کۆنی تۆپچییە، سەربارەی ئەوەی زۆر بەهێزە، هەروەها ڕووبەرێکی فراوانی هەبووە و لەساڵانی هەشتاکان لەلایەن کۆمپانیایەکی فەرەنسییەوە دروست کراوە.