مەلا بەختیار: ریفراندۆم بەڵگەیەکی مێژووییە و لە پشتیوانیکردنی پەشیمان نیم

K24 - هەولێر

مه‌لا به‌ختیار له‌ ساڵیادی دیاریكردنی رۆژی ریفراندۆم رایده‌گه‌یه‌نێت هەرگیز لە پشتیوانی و بەشداریکردن لە ریفراندۆمی سەربەخۆیی پاشگەزنابینەوە، دەشڵێ "ریفراندۆم بەڵگەیەکی مێژوویی و ویژدانییە".

مه‌لا به‌ختیار، ئه‌ندامی ئه‌نجوومه‌نی باڵای سیاسی و بەرژەوەندی یه‌كێتی له‌ گفتوگۆیه‌كی تایبه‌تدا له‌گه‌ڵ كوردستان24 له‌باره‌ی تێپه‌ڕبوونی سێ ساڵ به‌سه‌ر دیاریكردنی رۆژی ریفراندۆم، رایگه‌یاند بە سووربوونی سەرۆک بارزانی و دوای هەڵسەنگاندنی بارودۆخەکە بڕیار لە رۆژی ئەنجامدانی ریفراندۆم درا، دووپاتیشی دەکاتەوە هەرگیز لە پشتیوانی و بەشداریکردن لە ریفراندۆمی سەربەخۆیی پاشگەزنابنەوە.

لەبارەی کاردانەوەی وڵاتان لەدوای ریفراندۆمی سەربەخۆیی کوردستان، مەلا بەختیار دەڵێت عەبادی بەرپرسیارییەتی ئەو هەموو تاوان و خراپەکارییەکانی دوای ریفراندۆمی دەکەوێتە ئەستۆ، کە ئەو بە تەعریبی نوێ لەناوچە کوردستانییەکان وەسفی دەکات.