ئەو مووشەکەی ئاراستەی فڕۆکەخانەی بەغدا کرا "زیانێکی ئەوتۆی نەبوو"

K24 - بەغدا

بۆ جاری شەشەم لەماوەی دوو هەفتەدا مووشەکێکی جۆری کاتیۆشا کە لە گوندێکەوە ئاراستە کرابوو، لەنزیک فڕۆکەخانەی بەغدا کەوتە خوارەوە.

سوپای عێراق لە بەیاننامەیەکدا ئێوارەی دووشەممە (22-6-2020) رایگەیاند "مووشەکێکی جۆری کاتیۆشا لە دەوروبەری فڕۆکەخانەی نێودەوڵەتیی بەغدا کەوتەخوارەوە. مووشەکەکە لە گوندێکی رۆژئاوای بەغداوە ئارستە کراوە".

بەپیی بەیاننامەکەی سوپای عێراق، مووشەکەکە نەبووەتە هۆی زیانی گیانی و زیانی مادیشی کەم بووە.

کەوتنی مووشەکی جۆری کاتیۆشا و هاوەن لە ناوچەی سەوزی بەغدا و نزیک فڕۆکەخانەی نێودەوڵەتیی بەغدا، شتێکی دەگمەن نییە و رووداوێکە، بەردەوام دووبارە دەبێتەوە.