سوڵتان هاشم كۆچی دواییكرد

له‌ نه‌خۆشخانه‌یه‌كی زیقار

K24 – هه‌ولێر:

سه‌رچاوه‌یه‌كی ئه‌منی عێراق رایگه‌یاند، وه‌زیری پێشووی به‌رگری عێراق له‌ سه‌رده‌می رژێمی به‌عس، سوڵتان هاشم ئه‌حمه‌د له‌ نه‌خۆشخانه‌یه‌كی زیقار گیانی له‌ده‌ستداوه‌.

به‌ گوێره‌ی زانیاری ئه‌و سه‌رچاوه‌یه‌، كه‌ ناوی بڵاونه‌كراوه‌ته‌وه‌، سوڵتان هاشم ئه‌حمه‌د به‌ هۆی تووشبوونی به‌ نۆره‌ی دڵ له‌ نه‌خۆشخانه‌یه‌ك كۆچی دواییكردووه‌.

ژیاننامه‌ی سوڵتان هاشم

 

* سوڵتان هاشم ئه‌حمه‌د محه‌ممه‌د تائی، له‌ 1945 له‌ مووسڵ له‌دایكبووه‌.

* له‌ دیارترین به‌رپرسه‌ سه‌ربازییه‌ خاوه‌ن تواناكانی سوپای رژێمی به‌عس بووه‌ و له‌ 1995ه‌وه‌ كراوه‌ته‌ وه‌زیری به‌رگری.

* له‌ 1970 هاوسه‌رگیری له‌گه‌ڵ ئامۆزای خۆی كردووه‌. 10 منداڵی هه‌بووه‌. دوو كچ و هه‌شت كوڕ. گه‌وره‌كه‌یان ناوی ئه‌حمه‌ده‌ و له‌دایكبووی 1975ه‌.

* له‌ شه‌ڕه‌كانی عێراق و ئێران و شه‌ڕی كوه‌یتدا به‌شدارییه‌كی كارای كردووه‌.

* ده‌رچووی كۆلیژی سه‌ربازی بووه‌ له‌ 1964 و دواتر له‌ 1976 كۆلیژی ئه‌ركانی ته‌واوكردووه‌.

* كاتێك كۆلیژی ئه‌ركانی ته‌واوكردووه‌، كراوه‌ته‌ فه‌رمانده‌ی فه‌وجی لیوای پێنجی فیرقه‌ی چواره‌م و دواتر بووه‌ته‌ فه‌رمانده‌ی لیوا و پاشان فه‌رمانده‌ی فیرقه‌ و فه‌رمانداری هه‌ریه‌ك له‌ فیرقه‌كانی 4، 5، 15، 18، و 8ی سوپای عێراقی كردووه‌.

* له‌ یه‌كێتی سۆڤیه‌تی جاران، له‌ به‌ریتانیا و ئه‌مه‌ریكا خولی سه‌ربازی بینیوه‌ و وه‌ك مامۆستاش له‌ كۆلیژی سه‌ربازی وانه‌ی وتووه‌ته‌وه‌.

له‌ ساڵی 1980 تا 1988 كراوه‌ته‌ فه‌رمانده‌ی لیوای پێنجه‌می پیاده‌ له‌ فیرقه‌ی چوار و دواتر فه‌رمانده‌ی باڵای فیرقه‌ی چوار و پاشان فه‌رمانده‌ی فه‌یله‌قی پێنجه‌م و دواتریش فه‌رمانده‌ی فه‌یله‌قی یه‌كی له‌ كاتی شه‌ڕدا پێ دراوه‌.

* له‌ شه‌ڕی كوه‌یت، جێگری سه‌رۆك ئه‌ركانی ئۆپراسیۆنه‌كان بووه‌ و تا 1993 له‌و پله‌یه‌ ماوه‌ته‌وه‌.

* سه‌رۆكایه‌تی شاندی عێراقی كردووه‌ له‌ دانووستانه‌كانی ئاگربه‌ستی شه‌ڕی كوه‌یت له‌ 1991 و ئه‌و دانووستانانه‌ به‌ خه‌یمه‌ی سه‌فوان ناسراون و تێیدا بڕیاری كشانه‌وه‌ و شكستهێنانی سوپای عێراقی له‌ شه‌ڕی كوه‌یت په‌سند كرد.

* له‌ 1994 كراوه‌ته‌ پارێزگاری نه‌ینه‌وا.

* له‌ 1995 كراوه‌ته‌ سه‌رۆكی ده‌سته‌ی ئه‌ركانی سوپای عێراق.

* له‌ 1996 كراوه‌ته‌ وه‌زیری به‌رگری و ئه‌ندامی فه‌رمانده‌یی هێزه‌ چه‌كداره‌كانی عێراق و له‌ شوێنی عه‌لی حه‌سه‌ن مه‌جید ده‌ستبه‌كار بووه‌.

* له‌ مانگی سێپتێمبه‌ری 2003 ده‌ستگیركراوه‌ و رووبه‌ڕووی دادگا كراوه‌ته‌وه‌.

* له‌ 24ی حوزه‌یران/ یۆنیۆی 2007 دادگا بڕیاریدا به‌ هۆی ئه‌نجامدانی تاوانی دژ به‌ مرۆڤایه‌تی له‌سێداره‌ بدرێت.

* سوڵتان هاشم به‌ هۆی ئه‌نجامدان و سه‌رپه‌رشتیكردنی تاوانی ئه‌نفال و كۆمه‌ڵكوژی هاووڵاتیانی كورد له‌ كۆتایی ده‌یه‌ی هه‌شتاكاندا له‌ لایه‌ن دادگاوه‌ سزا درا.

* بڕیار بوو له‌ 11ی ئه‌یلوول/ سێپتێمبه‌ری 2007 له‌سێداره‌ بدرێت، به‌ڵام به‌ هۆی نه‌یارێتی سه‌رۆك و جێگری سه‌رۆك كۆماری عێراق بڕیاره‌كه‌ جێبه‌جێ نه‌كرا.