وه‌زاره‌تی ناوخۆ له‌ باره‌ی قه‌ده‌غه‌ی هاتوچۆ بڕیاری دا

رێككاره‌ نوێیه‌كان راگه‌یه‌ندران

K24 – هه‌ولێر:

وه‌زاره‌تی ناوخۆی حكومه‌تی هه‌رێمی كوردستان له‌ باره‌ی بڕیاری قه‌ده‌غه‌ی هاتوچۆ و رێكاره‌ نوێیه‌كانی به‌ره‌نگاربوونه‌وه‌ی كۆرۆنا به‌یانێكی نوێی بڵاوكرده‌وه‌.

ئه‌مڕۆ لیژنه‌ی باڵای به‌ره‌نگاربوونه‌وه‌ی كۆرۆنا به‌ مه‌به‌ستی گرتنه‌به‌ری رێكاری نوێ و تاوتوێكردنی ره‌وشی خۆپارێزی له‌ بڵاوبوونه‌وه‌ی زیاتری په‌تای كۆرۆنا كۆبوه‌وه‌ و ژماره‌یه‌ك بڕیاری ده‌ركرد.

پوخته‌ی بڕیاره‌كان:

یه‌كه‌م: له‌ هه‌موو شوێنه‌ گشتییه‌كان هاووڵاتیان ده‌بێت به‌ ده‌مامكه‌وه‌ بچنه‌ ژووره‌وه‌.

دووه‌م: سه‌رجه‌م سه‌نته‌ر و نۆڕینگه‌ پزیشكییه‌كان بۆ ماوه‌ی 14 رۆژ داده‌خرێن.

سێیه‌م: شوێنه‌ گه‌شتیارییه‌كان و پارك و كافتریا و چایخانه‌كان داده‌خرێن.

چواره‌م: هۆڵه‌كانی وه‌رزش و مه‌له‌وانگه‌ و یانه‌كانی شه‌وانه‌ به‌ داخراوی ده‌مێننه‌وه‌.

پێنجه‌م: سه‌رجه‌م بۆنه‌ ئاینی و كۆمه‌ڵایه‌تییه‌كان قه‌ده‌غه‌ن.

شه‌شه‌م: خواردنگه‌كان ده‌بێت ته‌نیا به‌ دیلیڤه‌ری كار بكه‌ن.

حه‌وته‌م: هاتوچۆی نێوان پارێزگاكان و ئیداره‌كان راده‌گیرێت.

هه‌شته‌م: هاتوچۆی نێوان هه‌رێم و عێراق بۆ ماوه‌ی هه‌فته‌یه‌ك راده‌گیرێت.

نۆیه‌م: هاتوچۆی دیپلۆماتكارانی بیانی و هێزه‌ هاوپه‌یمانه‌كان رێگه‌پێدراوه‌.

ده‌یه‌م:هاتوچۆی ئاژانس و رێكخراوه‌كانی یوئێن رێگه‌پێدراوه‌.

یازده‌یه‌م: شوفێری ئۆتۆمبێل ده‌بێت ده‌مامك ببه‌ستێت، به‌پێچه‌وانه‌وه‌ 50 هه‌زار دینار سزا ده‌درێت.

دوازده‌یه‌م: له‌ دامه‌زراوه‌كانی كه‌رتی تایبه‌ت ده‌بێت كارمه‌ندان ده‌مامك ببه‌ستن.

سیازده‌یه‌م: له‌ ده‌ره‌وه‌ی شوێن و باڵه‌خانه‌كان هه‌ر گردبوونه‌وه‌یه‌ك ده‌بێت ره‌چاوی مه‌ودای مه‌ترێك و نیو بكرێت.

چوارده‌یه‌م: ئه‌وانه‌ی ده‌گه‌ڕێنه‌وه‌ ده‌بێت به‌ڵێننامه‌ پڕ بكه‌نه‌وه‌ كه‌ خۆیان كه‌ره‌نتین ده‌كه‌ن.

پازده‌یه‌م: ئیبراهیم خه‌لیل بۆ ماوه‌ی یه‌ك هه‌فته‌ به‌ رووی گه‌شتیاران داده‌خرێت.

شازده‌یه‌م: ژووری ئۆپراسیۆنه‌كان و ئیداره‌ سه‌ربه‌خۆكان ده‌بێت ئه‌م خاڵانه‌ جێبه‌جێ بكه‌ن و چاودێری جێبه‌جێكردنیان بكه‌ن.