پێنج فڕۆکەی بێفڕۆکەوان لە سنووری شیلادزێ کەوتنەخوارەوە
K24 - شیلادزێ
بەیانیی ئەمڕۆ پێنج فڕۆکەی بێفڕۆکەوان لە نزیک دوو گوندی سنووری ناحیەی شیلادزێ لە پارێزگای دهۆک کەوتنە خوارەوە.
فڕۆکە بێفڕۆکەوانەکان یەکێکیان لە گوندی باوان و ئەوەی دیکە لە گوندی دێوکێ کەوتوون، سێی دیکەیان لەنزیک گوندی دێوکێ کەوتوون و هیچ ئاسەواریکی بەرکەوتن و زەبریان پێوە دیار نییە.
شیمال بەرچی، پەیامنێری کوردستان24 لە سنوورەکەوە رایگەیاند "هەتاوەکو ئێستا نازانرێت ئەو فڕۆکانە سەر بە چ لایەکن، بەڵام هەندێک لە خەڵکی گوندەکان دەڵێن فڕۆکەی تورکین، هەندێکی دیکەشیان دەڵێن رەنگە فڕۆکەی پەکەکە بن".
چەندین هەفتەیە بارەگاکانی پەکەکە لەلایەن تورکیاوە لە ناوچە سنوورییەکانی هەرێمی کوردستان بۆردوومان دەکرێن و لە چیای کوڕەژار کە بەسەر شیلادزێ دەڕوانێت، بۆردوومان هەبووە، بەڵام تائێستا فڕۆکەکانی تورکیا لەنزیک ئەو دوو گوندە بۆردوومانیان نەکردووە.
پەیامنێرەکەی کوردستان24 هەروەها دەڵێ، ئێستا هێزە ئەمنییەکان لە ناوچەکەن و ئەوان گوتوویانە رەنگە بەهۆی کێشەی تەکنیکی، ئەو فڕۆکانە کەوتبنە خوارەوە، لەنزیک یەکێک لە فڕۆکەکانیش گوللـە هاوەنێک دۆزراوەتەوە کە پێدەچێت بە فڕۆکەکەوە بەسترابێتەوە.
