كۆبوونەوەی شاندی حكومەتی هەرێم و حكومەتی عێراق دە‌ستیپێكرد
K24 - بەغدا
یەكەم كۆبوونەوەی شاندی باڵای حكومەتی ھەرێمی كوردستان بە سەرۆكایەتی قوباد تاڵە‌بانی، لەگەڵ شاندی حكومەتی فیدراڵ بە سەرۆكایەتی عەلی عەلاوی وەزیری دارایی و جێگری سەرۆك وەزیران بەڕێوەچوو.
سە‌میر ھە‌ورامی وتەبێژی جێگری سە‌رۆكی حكومەتی ھەرێمی كوردستان رایگەیاند "لەپاش گەیشتنیان بۆ بەغدا، پێش نیوەڕۆی ئەمڕۆ 8 ئەیلولی 2020 یەكەم كۆبوونەوەی فراوانی هەردوو شاندی حكومەتی هەرێم و حكومەتی فیدراڵ لە بارە‌ی كێشە ھە‌ڵپە‌سێردراوە‌كان، بە‌تایبە‌ت پرسی شایستە داراییە‌كانی ھە‌رێم و چۆنییە‌تی جێگیركردنیان لە پڕۆژە یاسای بودجە‌ی گشتی عێراق بۆ ساڵی 2021 بەڕێوەچوو".
گوتیشی "لە كۆبوونەوەكەدا بڕیاردرا لیژنەی تایبەتمەند و لاوەكی دروست بكرێن بۆ چڕكردنەوەی گفتوگۆكان لەبارەی پرسەكانی نەوت و گاز، شایستە داراییەكان، كارەبا، دەروازە سنوورییەكان و قەرزەكان".
وتەبێژی جێگری سەرۆکی حکومەتی هەرێم ئاماژەی بەوەشكرد "چاوەڕوان دەكرێت ئەم لیژنانە سەرەنجامی بەدواداچوون و گفتوگۆكانیان لەبەر رۆشنایی بڕگە و ماددە‌‌كانی دەستوری عێراق بخەنە بەردەستی وەفدی باڵای هەردوولا بۆ ئە‌وە‌ی رێككە‌وتنیان لە‌بارە‌وە بكرێت".
جەختیكردەوە "حكومەتی ھە‌رێم ئامادە‌یی دە‌ربڕیوە بۆ رێككە‌وتن لەگەڵ حكومەتی فیدراڵی سە‌بارە‌ت بە پرسی داھاتی نە‌وتی و نا نە‌وتی و داھاتی دەروازە سنورییە‌كان".
