بەوێنە: گیانلەدەستدانی 10 کەس لەئەنجامی رووخانی باڵەخانەیەک لە هیندستان

K24 - هەولێر

10 کەس بەهۆی رووخانی باڵەخانەیەک لە هیندستان گیانیان لەدەستدا، 11 کەسی دیکەش بریندار بوون.

باڵەخانە چوار نهۆمییەکە دەکەوتە شاری مۆمبای لە هیندستان، رۆژی دووشەممە (21-9-2020) بەهۆی بارانی بەخوڕ رووخا. رووخانەکەی بەجۆرێکە هەموو نهۆمەکان بەسەر یەکدی داتەپیون و تەنیا سەقفەکە بە ساغی ماوەتەوە.

ساتیا پرادان، سەرۆکی تیمە نیشتمانییەکانی بەدەمەوەهاتن لەکاتی کارەساتەکان، بە میدیاکانی وڵاتەکەی راگەیاند: "تیمەکانی فریاکەوتن خەریکی گەڕانن بەشوێن 20 بۆ 25 کەس، کە لەژێر داروپەردووی باڵەخانە رووخاوەکە گیریان خواردووە".

ئەو رووداوە لە هیندستان دەگمەن نییە، بەجۆرێک ساڵانە بەتایبەتی لەنێوان مانگی حوزەیران و ئەیلوول رووداوی هاوشێوە دووبارە دەبنەوە و، باڵەخانەی کۆن و ئەوانەش کە لەڕووی بیناسازییەوە رێکوپێک دروست نەکراون، بەهۆی بارانی وەرزییەوە زیانیان پێدەگات.

هـ.ر.