توركمانانی كه‌ركووك داوای دوورخستنه‌وه‌ی راكان جبووری ده‌كه‌ن

توركمانانی كه‌ركووك: راکان جبووری بووه‌ته‌ کێشەی نێوان پێكھاتەكان
kurdistan24.net

K24- كه‌ركووك:

ژمارەیە تورکمانی کەرکووك داوای دوورخستنەوەی پارێزگاری سه‌پێندراوی کەرکووك لە پۆستەكەی دەکەن و پێیان وایە، راکان جبووری بووه‌تە کێشەی نێوان پێكھاتەكان و هەڕەشە بۆ ئاشتەوایی کۆمەڵایەتی له‌و شاره‌.

هه‌روه‌ها به‌وه‌ش تۆمەتباری دەکەن، کە مافی تورکمانەکان نادات و خەریکی تەعریبکردنی کەرکووکە.

له‌و باره‌شه‌وه‌ عه‌باس ئاوچی، كه‌ هاووڵاتییه‌كی توركمانه‌ ده‌ڵێت: "ئێمەی تورکمان نوێنەرمان نیە، بێ کەسین، سیاسیەکانمان تەنها بەرژەوەندی خۆیان دەوێ، ئێمە خۆمان نوێنەرایەتی خۆمان دەکەین".

هاوكات لەپاڵ تورکمانەکان، کوردیش لەدۆخەكە ناڕازین و داوای گۆڕانکاری ئیداری لەشارەکەیان دەكەن.

توڕه‌یی تورکمانه‌كان گەیشتووه‌تە ئاستێك، کە داوا لە نوێنەرەکانیان دەکەن لەگەڵ کورد رێکبکەون و ئەم پارێزگارەی ئێستا لە پۆستەکەی دووربخەنەوە.

نزیك دەبێتەوە لە سێ ساڵ، بارودۆخی کەرکووك نائاساییە و حاکمێکی سەربازی حوکمی دەکات، شارەکە پڕ بووە لە هێزی سەربازی و بارودۆخی ئەمنیش ناجێگیرە.

H.B