قایمقامی نوێی سۆران ھەڵبژێردرا
K24 – ھەولێر
لە كۆبوونەوەی ئەمڕۆی ئەنجومەنی پارێزگای ھەولێر، ھەڵگورد نەجیب، وەك قایمقامی نوێی سۆران ھەڵبژێردرا.
ھەڵگورد نەجیب، لە كۆنفرانسێكی رۆژنامەوانیدا رایگەیاند: "لە چوارچێوەی كارنامەی كابینەی نۆیەمی حكومەتی ھەرێمی كوردستان، پلانی تایبەتمان ھەیە بۆ خزمەتكردنی زیاتری قەزای سۆران".
گوتیشی: "ھەوڵدەدەین ئەو بەڕێوەبەرایەتی و فەرمانگانەی تائێستا لە سۆران نەكراونەتەوە لە ئایندەیەكی نزیك بكرێنەوە، بۆ ئەوەی خەڵك بۆ مامەڵەكانیان نێنە ھەولێر".
قایمقامی سۆران ئەوەشی خستەڕوو: "بەھۆی ئەو دۆخەی ھەیە، نامەوێت بەڵێنی گەورە بە خەڵك بدەین، بەڵام بەپێی توانا ئەوەی پێیمان بكرێت بۆ خزمەتی خەڵكی سۆران دەیكەین".
پوختەیەك لە ژیاننامەی هەڵگورد شێخ نەجیب قایمقامی سۆران:..
ئەندازیار هەڵگورد شێخ نەجیب شێخ عوسمان لە ١\٩\١٩٧٣ لە ناحیەی دیانا لە باوەشی یەکێک لە بنەماڵە ناودارەکانی دەڤەری سۆران لەدایکبووە.
-بنەماڵەکەی بەشدارییەکی کاریان لە بزووتنەوەی رزگاریخوازی کوردستان و کاریگەری زۆریان هەبووە لە چارەسەرکردنی کێشە کۆمەڵاتییەکان و پەرەپێدانی خوێندەواری و رۆشنبیری لە دەڤەری سۆران.
-لە تەمەنی یەک ساڵی لەگەڵ ماڵباتەکەی بەهۆی تێکچوونی شۆڕشی ئەیلول و رێککەتنامەی جەزائیر ئاوارەیی ئێران دەبن.
- خوێندنی سەرەتایی لە شارۆچکەیی دیانا تەواو کردووە.
- ١٩٩١- ١٩٩٢ بەرپرسی ناوچەی هەولێری یەکێتی قوتابیان و لاوانی کوردستان بووە.
- ١٩٩٢- ١٩٩٤پەیوەندی بە ریزەکانی لەشکری یەکگرتووی کوردستان کردووە و بووەتە ئەفسەری هەواڵگری.
- ١٩٩٤-١٩٩٨ لە سوپای دووی لەشکری شۆڕشگێڕی کوردستان بووەتە ئەفسەر و ئەرکەکانی بەو پەڕی توانا و لێهاتوویەوە جێبەجێکردووە.
- ساڵی ١٩٩٨ بۆ خوێندن روو لە شاری لەندەنی پایتەختی بەریتانیا دەکات.
- ساڵی ٢٠٠٣ بڕوانامەی بەکالۆریۆس بە پلەی باڵا لە زانستی کۆمپیوتەر لە زانکۆی کوین ماری لە لەندەن وەرگرتووە.
- ساڵی ٢٠٠٦ بروانامەی تایبەتی بە بواری ئەندازیاری نیتۆڕکینگ لە ئەمەریکا بە دەستهێناوە.
- ساڵی ٢٠١٤ بڕوانامەی ماستەری لە بواری ئەندازیاری کۆمپیوتەر و تۆڕەکانی ئینتەرنێت بەدەستهێناوە.
- ساڵی ٢٠٠٩ گەڕاوەتە کوردستان و گرووپی قوتابخانەکانی کامبرێجی نێودەوڵەتیان دامەزراندووە.
-بەڕێوەبەری گشتی گرووپی قوتابخانەکانی کامبرێجی نێودەوڵەتییە.