بەرھەمی ھەناری نزیكەی 20 جوتیار لە ھەڵەبجە نمایش دەكرێن

K24 – ھەڵەبجە

ئەمڕۆ لە فێستیڤاڵێكدا لەناو كێڵگەی جوتیارە نموونەیەكەی ھەڵەبجە بەرھەمی ھەناری نزیكەی 20 جوتیار و بەشێكی دیكە لە بەرھەمە كشتوكاڵییەكانی ھەڵەبجە نمایش دەكرێن و فێستیڤاڵەكە دوو رۆژ بەردەوام دەبێت.

لەمیانی بەشداریكردنی لە بەرنامەی رۆژباشی كوردستان24دا ئازاد محەمەد، ناسراو بە (جوتیارە نموونەیەكە) گوتی: "ئەمساڵ جگە لە نمایشكردنی بەرھەمەكان، ساردكەرەوەیەكم دروستكردووە، بۆ ئەوەی پاڵپشت بێت بۆ جوتیاران، ھەنار و بەرھەمەكانی دیكەی تێدا ھەڵگرن، ئەو ساردكەرەوەیە كوردیە بەبێ نەوت و غاز و كارەبا ئیش دەكات".

ئاشكرای كرد: "لە فێستیڤاڵەكەی ئەمڕۆدا بەرھەمی ھەناری نزیكەی 20 جوتیاری شارەزوور و شوێنەكانی دیكە نمایش دەكرێن".

جوتیارە نمونەیەكە راشیگەیاند: "جگە لە بەرھەمە كشتوكاڵییەكان، ژمارەیەك خانمی دەستڕەنگین بە دروستكردنی خواردنی كوردەواری بەشداری لە فێستیڤاڵەكە دەكەن".

ئاماژەی بەوەشكرد، لە رۆژانی داھاتوودا ئەو فێستیڤاڵە بۆ نمایشكردنی بەرھەمی جوتیارەكان لە ھەولێر و دھۆك دەكاتەوە.