ئەڵمانیا و فەره‌نسا دوو ھەفتە مۆڵەت بە توركیا دەدەن

وەزیری دەرەوەی فەره‌نسا: توركیا بە بەردەوامی ھەراسانكاری ناقەبووڵكراو ئەنجامدەدات

K24 – ھەولێر:

ئەمڕۆ پێنجەشەممە، ئەڵمانیا و فەرەنسا، توركیایان تۆمەتباركرد بەبەردەوامیدان بە ھەراسانكارییەكانی دژ بە یەكێتی ئەوروپا لە دەریای ناوەڕاست و ماوەی دوو ھەفتەیان بە ئەنقەرە دا بۆ روونكردنەوەی ھەڵوێستەكەی.

وەزیری دەرەوەی ئەڵمانیا، ھایكۆ ماس، لە میانی كۆنگرەیەكی رۆژنامەوانی ھاوبەشدا لەگەڵ ھاوتا فەرەنساییەكەی، جان ئێف لۆدریان، وھاوتا پۆڵه‌ندیەكەی زبیگنیف راو سەركۆنەی بڕیارەكەی توركیای كرد بە ناردنەوەی كەشتی "عروج رەئیس" بۆ گەڕان بەدوای غاز و نەوتدا لە ئاوی كێشە لە سەر لە نێوان یۆنان و قوبرسدا لە رۆژھەڵاتی دەریای سپیی ناوەڕاستدا و ئەو بڕیارەی بە "قبووڵنەكراو" وەسفكرد.

لە وەڵامدانەوەی پرسیارێكدا، كە ئایا یەكێتی ئەوروپا سزا  بەسەر توركیادا دەسەپێنێت لە ئەنجامی ئەم پێشھاتانەی ئەم دواییە لە رۆژھەڵاتی دەریای ناوڕاستدا، ماس گوتی: یەكێتی ھەفتەیەك چاوەڕێ دەكات پێش ئەوەی بڕیار بدات لەسەر چۆنییەتی رەفتاركردن لەم دۆخەدا.

روونیشیكردەوە، "پێشتر گفتوگۆی چاوەڕوانكراو دوو جار ئەنجاممان نەداوە و نازانین كە ئەنجامدەدرێت،  دەبێت چاوەڕێ بكەین بزانین لە میانی ھەفتەیەكدا ھیچ پێشھات نوێ روودەدەن، ئەوسا لێكۆڵینەوە لەو ھەڵوێستە دەكەین، كە پێویستە یەكێتی ئەوروپا وەریگرێت".

لە لایەن خۆیەوە، وەزیری دەرەوەی فەرەنسا، لۆدریان گوتی: توركیا "بە بەردەوامی ھەراسانكاری ناقەبووڵكراو ئەنجامدەدات". جەختیشیكردەوە، كەوا " تۆپەكە ئێستا لە گۆڕەپانی ئەنقەرە دایە، بەڵام یەكێتی ئەوروپا ئامادەیە تەرازووی ھێز بگۆڕێت، ئەگەر توركیا نەگەڕێتەوە بۆ گفتوگۆ".

لۆدریان رەخنەی لە رۆڵی توركیا گرت لە شەڕی نێوان ئەرمینیا و ئازەربایجان لە ناوچەی قەرەباخ، جەختیشیكردەوە، ھیچ چارەسەرییەكی سەربازی بۆ قەیرانەكە نییە، بۆیە دەبێت ئاگربەست جێبەجێبكرێت.

گوتیشی: "ئەوەی ئەمڕۆ دەیبینین، توركیا تاكە وڵاتە داوای رێزگرتن لە ئاگربەست ناكات، ئەمەش كارێكی زیانبەخشە".

سەرچاوە: رۆیتەرز