پۆلیسی دهۆك ره‌تیكرده‌وه‌ له‌ ده‌ستگیركردنی تۆمه‌تباراندا پێشێلی مافه‌كانیان كرابێت

روونكردنه‌وه‌یه‌ك له‌ پۆلیسی دهۆكه‌وه‌

K24 – هه‌ولێر:

به‌ڕێوبه‌رایه‌تی پۆلیسی پارێزگای دهۆك له‌ روونكردنه‌وه‌یه‌كدا، كه‌ وێنه‌یه‌كی بۆ "كوردستان24" نێردراوه‌، ئه‌و ده‌نگۆیانه‌ی ره‌تكردووه‌ته‌وه‌، گوایه‌ هێزه‌كانی پۆلیس له‌ كاتی ده‌ستگیركردنی چه‌ند تۆمه‌تبارێك، ده‌ستیان به‌سه‌ر ماڵیاندا گرتبێت و پێشێلی یاسایان كردبێت و رایده‌گه‌یه‌نێت، "ئه‌و كه‌سانه‌ی ده‌ستگیركراوون، به‌ بڕیاری دادوه‌ر و له‌ چوارچێوه‌ی یاسادا به‌وپه‌ڕی رێزلێگرتنه‌وه‌ ره‌وانه‌ی به‌رده‌م دادگا كراوون".

ده‌قی روونكردنه‌وه‌كه‌

بەیاننامەك ژ رێڤەبەریا پولیسێن پارێزگەها دهوکێ 

ئەڤرو ل رێکەفتی 22/10/2020 دەنگویێ دەستەسەرکرنا چەند تومەتباران ل تورێن جڤاکی و هندەک کەنالان هاتیە راگەهاندن و ب مخابنی ڤە رادگەهینین دویر ژ ئەتەکێتێن کارێ روژنامەڤانی و بێ بەرپرسیارانە گوتنێن کێم و زێدە هاتینە کرن و ل گەلەک پەیج و کەنالان هاتیە گوتن کو بێرێزی ب تومەتباران هاتیە کرن و دسەر ماڵا وان دا گرتیە، ئەم وەکو رێڤەبەریا پولیسێن پارێزگەها دهوکێ ڤی خەبەری رەد دکەین و ب هیچ رەنگەکی ئەڤا هاتیە گوتن نەهاتیە رویدان و دورە ژ راستیێ و هندەك کەس و لایەنێن تێکدەرو هەوڵا تێکدانا رەوشا ئاراما پارێزگەها دهوکێ دکەن و بو شێواندن و ڤەشارتنا راستیان ڤان خەبەرێن بێ بنەما بەلاڤ دکەن.

 یا راست سەبارەت بابەتێ ئەڤرو فەرمانا گرتنێ ژلایێ دادوەری ڤە ل دویڤ بەندێ ( بەندێ ۲۲۱ ژیاسایێن سزای) بو چەند تومەتباران ل دهوکێ دەرچویە و و پولیس و دەزگایێن دی یێن ئەمنی ل ژێر سەرپەرشتیا رێڤەبەرێ پولیسان عمید شعلان ئەحمەد وەکو هەر فەرمانەکا دی یا گرتنێ کارێ خو جێبەجێکریە و بابەت گەلەکێ سروشتی یە و بو هاولاتیێن هێژا دیار دکەین کو بێرێزی ب هیچ رەنگەکی ب تومەتباران نەهاتیەکرن و ئەو کەسێن هاتینە گرتن ب رێزگرتن و ل دیف یاسایێ هاتینە رەوانەکرن بو دادگەهێ و بجوانترین شێوە سەرەدەری دگەل هاتیە کرن بو زانین و روهنکرن .

رێڤەبەریا پولیسێن پارێزگەها دهوکێ

22/10/2020