لە رۆژئاوای كوردستان ھۆشداری لە شەپۆلێكی دیكەی كۆچبەری دەدرێت
K24 - ھەولێر
بەھۆی بەردەوامی ھێرشەكانی توركیا ھۆشداری لە ئەگەری شەپۆلێكی دیكەی ئاوارەیی لە شاری گرێسپی رۆژئاوای كوردستان دەدرێت.
ئەنجومەنی گرێ سپی پەیامێكی لە رێگەی بەشێك لە میدیاكانی رۆژئاوای كوردستان بڵاوكردووەتەوە و ئاماژەی بەوە كردووە، ئەگەر ھەیە شەپۆلێكی دیكەی ئاوارەیی لە ناوچەكە روو بدات، ئەگەر سوپای توركیا و گرووپە چەكدارەكان لە ھێرش و پێشێلكارییەكانیان دژی خەڵكی بەردەوام بن.
لە بەشێكی ئەو پەیامەدا، ئەنجومەنی گرێسپی داوا لە كۆمەڵگەی نێودەوڵەتی كردووە، فشار لە توركیا بكات بۆ وەستاندنی پێشێلكارییەكان.
لە 9/10/2019 سوپای توركیا بە ھاوكاری گرووپە میلیشیاكانی سووریا ھێرشی كردە سەر رۆژئاوای كوردستان و بەشێك لە ناوچە سنوورییەكانی داگیر كرد و بەھۆی بۆردومان و تۆپبارانەكانیش بەشێك لە ھاووڵاتییان بوونە قوربانی، ھاوكات ژمارەیەكی زۆری دانیشتووانی ئەو ناوچانە بەتایبەتی لە سنووری گرێسپی و سەرێكانی ئاوارەبن.
پێیشتریش شاری عەفرین لە 18 ئاداری 2018 لەلایەن سوپای توركیا و چەكدارانی ئۆپۆزسیۆنی سووریا داگیركرا. بەشێك لە خەڵكی عەفرین ئاوارەی بوون.