په‌یامی نێچیرڤان بارزانی بۆ یادی له‌دایکبوونی پێغه‌مبه‌ر (د.خ)
K24- هه‌ولێر:
به‌بۆنه‌ی یادی له‌دایكبوونی پێغه‌مبه‌ری ئیسلام، حه‌زره‌تی محه‌مه‌د (د.خ)، نێچیرڤان بارزانی، سه‌رۆكی هه‌رێمی كوردستان پیرۆزبایی له سه‌رجه‌م موسڵمانانی كوردستان، عێراق و جیهان ده‌كات و هیوا ده‌خوازێت، ئه‌و یاده ببێته هاندەری لێبوردەیی و پێکەوەژیانی ئاشتیانەی نێوان مرۆڤەکان.
ده‌قی په‌یامی پیرۆزبایی نێچیرڤان بارزانی بۆ موسڵمانان:
له یادی لەدایکبوونی پێغەمبەری ئیسلامدا حه‌زره‌تی محەمەد "د.خ"، گەرمترین پیرۆزبایی لە موسڵمانانی كوردستان و عیراق و جیهان دەكەم.
هیوادارم یادی لەدایکبوونی پێغەمبەر، هاندەری لێبوردەیی و پێکەوەژیانی ئاشتیانە و دۆستایەتی و گەردنئازادیی نێوان مرۆڤەکان و تەواوی گەلان و ئایین و ئایینزاکان بێت لە ناوچەکە و جیهاندا.
باشترین یادکردنەوەی حەزرەتی محەمەد پابەندییه بە پەیام و فەرمایشت و ئاکار و رەوشتە بەرزەکانی کە لە بەخشندەیی و بەزەیی و لێبوردەیی و ئاشتەواییدا بەرجەستەیە.
جارێكی تر ئه‌م یاده له سه‌رجه‌م موسڵمانان پیرۆز دەکەم و لە خوای مەزن داواکارم دەروازەی خێر و خۆشی لە گەلەکەمان و سەرجەم مرۆڤایەتی بکاتەوە و کۆتایی به مه‌ینه‌تییه‌کان بێت.
نێچیرڤان بارزانی
سه‌رۆکی هه‌رێمی کوردستان
11ی ره‌بیعولئه‌ووه‌لی 1442ی کۆچی
28/10/2020
H.B