سبەی هەڵبژاردنی یەکلاکەرەوەی سەرۆکایەتیی ئەمەریکا بەڕێوەدەچێت

تائێستا زیاتر لە 93 ملیۆن کەس پێشوەختە دەنگیان داوە

K24 - هەولێر

کەمتر لە 24 کاتژمێر ماوە بۆ دەستپێکردنی دەنگدان لە ئەمەریکا. ئه‌مڕۆ كۆتا رۆژی كه‌مپه‌ینه‌كانی هه‌ڵبژاردنی سه‌رۆكایه‌تی ئه‌مریكا و دوا رۆژی ده‌نگدانی پێشوه‌خته‌یە، کە تائێستا زیاتر لە 93 ملیۆن کەس دەنگیان داوە.

سبەی (سێشەممە، 3-11-2020) هەڵبژاردنی یەكلاكەرەوە بۆ سەرۆكایەتیی ویلایەتە یەکگرتووەکانی ئەمەریکا بەڕێوەدەچێت.

لەو ملیۆنان کەسەی لە دەنگدانی پێشوەختە دەنگیان داوە، نزیكه‌ی 60 ملیۆنیان له‌ رێگه‌ی پۆسته‌ و زیاتر له‌ 33 ملیۆنیش له‌ رێگه‌ی سندووقه‌كانی ده‌نگدانه‌وه دەنگیان داوە.

دیموکراتەکان، پاڵپشتی لە دەنگدانی پێشوەختە دەکەن و ھانی خەڵکی دەدەن ھەرچی زووترە دەنگ بدەن. بەپێچەوانەوە کۆمارییەکان و دۆناڵد ترەمپ دژی دەنگدانی پێشوەختەن و پێیانوایە دەنگدانی پێشوەختە دەرفەتی گزی و فێڵکردن زیاتر دەکات.

ساڵی 2016‌، تەنیا 33 ملیۆن کەس پێشوەختە به ‌پۆست دەنگیانداوە، واتا لە ھەڵبژاردنی ئەمساڵدا نزیكه‌ی سێ هێنده‌ی ئه‌و ژمارەیەیە، ئەو ئامارەش لە مێژووی ئەمریکادا بێوێنه‌یه‌.

 

هـ.ر.