سه‌رۆكی دۆمای رووسیا: هه‌ڵبژاردنی ئه‌مه‌ریكا نمایشێكی شانۆییه
K24 – هه‌ولێر:
سه‌رۆكی ئه‌نجوومه‌نی نوێنه‌رانی رووسیا، ناسراو به "دۆما"، "ڤیاچیسلاڤ ڤۆلۆدین" رایگه‌یاند، هه‌ڵبژاردنی سه‌رۆكایه‌تی ئه‌مه‌ریكا، "نمایشێكی شانۆییه" پێشكه‌ش ده‌كرێت وه‌ك نموونه‌یه‌ك بۆ "دیموكراتی".
له لێدوانێكدا بۆ كه‌ناڵی "رووسیا24" سه‌رۆكی دۆمای رووسیا گوتی: "ئێوه ده‌زانن ئه‌مه نمایشێكی شانۆییه، ناكرێت له‌وه زیاتر هیچ ناوێكی دیكه‌ی لێ بنرێت. زۆرێك ده‌چنه سه‌ر شاشه‌كان، به‌ڵام پێویسته تێبگه‌ین و بزانین ئه‌مه شانۆگه‌رییه. ئه‌و شانۆگه‌رییه وه‌ك نموونه‌یه‌ك بۆ دیموكراتی نمایش ده‌كه‌ن. له‌وه زیاتریش تێده‌په‌ڕێنن و پێشنیاز ده‌كرێت بكرێته پێوه‌رێك بۆ دیموكراتی، من وای نابینم و پێم وانییه هه‌ڵبژاردنی ئه‌مه‌ریكا پێوه‌رێك بێت بۆ دیموكراتی".
هه‌روه‌ها گوتی: به‌راوردی هه‌ڵبژاردنی سه‌رۆكایه‌تی رووسیا و فره‌یی حزبه سیاسییه‌كان له رووسیا بكه‌ن، له‌گه‌ڵ ئه‌و سیستمه‌ی له ئه‌مه‌ریكا هه‌یه، كه ته‌نیا دوو لایه‌ن كاندیدیان هه‌یه بۆ پۆستی سه‌رۆكایه‌تی وڵات.
ئه‌مڕۆ (3ی تشرینی دووه‌م/ نۆڤێمبه‌ری 2020) پرۆسه‌ی هه‌ڵبژاردنی سه‌رۆكایه‌تی ئه‌مه‌ریكا، به‌ڕێوه‌چوو و هه‌ریه‌ك له دۆناڵد تره‌مپ، كاندیدی كۆمارییه‌كان و جۆ بایدن، كاندیدی دیموكراته‌كان كێبڕكێی یه‌ك ده‌كه‌ن.