ئێران داوای دەرخستنی" گرووپە تەكفیرییەكان" دەكات لە قەرەباخ

K24 – ھەولێر:

گوتەبێژی وەزارەتی دەرەوەی كۆماری ئیسلامی ئێران، سەعید خەتیبزادە ئەمڕۆ دووشەممە، جەختیكردەوە لەوەی راگرتنی شەڕ لە قەرەباخ ھەنگاوێكی زۆر كاریگەرە و داواشیكرد "گرووپە تەكفیرییەكان" ده‌ستبه‌جێ لە قەرەباغ دەرچن".

زادە گوتی: "داوا دەكەین ده‌ستبه‌جێ گرووپە تەكفیرییەكان لە قەرەباغ دەربچن و ھیچ بیانوویەك بۆ مانەوەیان لە ناوچەكەدا نەماوە". روونیشیكردەوە "راگرتنی شەڕ لە قەرەباغ لەوانەیە كۆتا بە تەنگژەكە نەھێنێت، بەڵام ھەنگاوێكی زۆر كاریگەرە".

گوتیشی: "بەپێی ئەو زانیارییانەی دەست ئێران كەوتوون، تەكفیرییەكان خاكی سنوورییان لەگەڵ ئازەربایجان جێھێشتووە".

خه‌تیبزادە لە قسەكانیدا لە بارەی جوگرافیای سنووری نێوان ئێران و ئەرمینیا ئاماژەیكرد، "رێككەوتنی راگرتنی شەڕ لە قەرەباخ، سنووری جوگرافی نێوان ئێران و ئەرمینیای نەگۆڕیوە، "جەختیشكردەوە "لەوەی ئەو ھەواڵانەی باس لە گۆڕانی جوگرافیای سنووری نێوان ئێران و ئەرمینیا دەكەن، راستە نییە و تەنھا ژاوەژاوی ھەندێك لە دەزگا راگەیاندنەكانە".

دووپاتیشیكردەوە "سنووری جوگرافی ئێران و ناوچەكە نەگۆڕاوە و ھەرگیز ناگۆڕێت و تاران بەوردی چاودێری دۆسییەكە دەكات و ھۆشداریشیداوە لە سته‌مكردن".

سەرچاوە: "RT"