ڕاگەیەندراوێک لە دەستەی گشتیی ناوچە کوردستانییەکانی دەرەوەی ئیدارەی هەرێم
ئەمڕۆ شەممە، 29ـی تشرینی دووەمی 2025، لە ڕاگەیەندراوێکدا دەستەی گشتیی ناوچە کوردستانییەکانی دەرەوەی ئیدارەی هەرێم ڕایگەیاند؛ ڕۆژی چوارشەممە ڕێککەوتی 26/11/2025، دوای ئەوەی وەزارەتی پلاندانانی عێراق دەرئەنجامی سەرژمێریی گشتیی عێراقی ڕاگەیاند، بەپێویستی دەزانین جەخت لە چەند خاڵێکی گرنگ بکەینەوە. وەک ئاشکرایە، بڕیاری هاوبەشی هەردوو وەزارەتی پلاندانانی حکوومەتی عێراقی فیدراڵ و حکوومەتی هەرێمی کوردستان ئەوە بوو کە لە کەرکووک و ناوچە کوردستانییەکان، سەرژمێریی ساڵی 1957 بکرێتە بنەما.
لەو چوارچێوەیەشدا، ئەنجوومەنی وەزیرانی عێراق لە کۆبوونەوەی ئاسایی خۆیدا لە ڕێکەوتی 5/11/2024 بڕیاریدا، پێش ڕاگەیاندنی دەرئەنجامەکان، دۆسیەی تەواوی ئەو هاووڵاتییانەی لە ناوەڕاست و خوارووی عێراقەوە هاتوون و ئێستا لە کەرکووک نیشتەجێن (واتە ئەوانەی بەشێک نین لە سەرژمێریی 1957)، بۆ ناوچەکانی خۆیان بگەڕێندرێتەوە.
بەڵام بەداخەوە، هیچ جۆرە پابەندبوونێک بەم بڕیارەوە بەدی ناکرێت. ئێمە ئەمە بە مەترسییەکی جدی لەسەر ئەو ناوچانە دەبینین و بە پێچەوانەی بنەما گشتییەکانی مادەی 140ـی دەستووری دەزانین. بێگومان ئەم پێشهاتە مەترسیدارە، نیگەرانییەکانی پێشووی ئێمەی بە ڕاست دەرخست.
لێرەوە ڕایدەگەیەنین، ئەگەر ڕوونکردنەوەی پێویست و بڕواپێکراو لەلایەن بەغداوە بە حکوومەتی هەرێم نەدرێت، ململانێ دەستوورییەکانی نێوانمان دەگوازێتەوە بۆ قۆناغێکی دژوارتر. لای هەموو لایەک ڕوون بێت کە هەر جۆرە دەستبردنێک بۆ گۆڕینی ناسنامە و دیموگرافیای شاری کەرکووک، خانەقین، شەنگال و تەواوی ناوچە کوردستانییەکان، بە هیچ شێوەیەک قبوڵکراو نییە.
پێویستە لە دەرەوەی ململانێ ناوخۆییەکانی هەرێمی کوردستان، حکوومەت و سەرجەم لایەنە سیاسییەکان ئەم دۆخە بە هەند وەرگرن و ئەرکی لەپێشینەمان پاراستنی ناسنامەی کوردستانیبوونی کەرکووک و تەواوی ناوچە کێشەلەسەرەکان بێت.
