مەزڵوم كۆبانی: رێككەوتنێك ھەیە بۆ ئەوەی پەكەكە لە سووریا بكشێتەوە

K24 – ھەولێر:

فەرماندەی ھێزەكانی سووریای دیموكرات (ھەسەدە) مەزڵوم عەبدی ئاشكرایكرد، رێككەوتنێك ھەیە لەنێوان ھەردوو جەمسەری بزووتنەوەی كوردی بە چاودێری ئەمەریكا، بەپێی ئەو رێككەوتنە كادیرەكانی پارتی كرێكارانی كوردستان (پەكەكە) ھێواش ھێواش لە سووریا دەكشێنەوە.

كۆمەڵەی تەنگژە نێودەوڵەتییەكان (Crisis Group) راپۆرتێكی بەرفراوانی بڵاوكردووەتەوە لە ژێر ناوونیشانی "ھێزەكانی سووریا دیموكرات بەدوای رێگایەكدا دەگەڕێت بۆ سەقامگیری بەرده‌وام لە باكووری رۆژھەڵاتی سووریا".

راپۆرتەكە زۆر لە پرسەكانی پەیوەست بە ناوچەی بەڕێوبەرایەتی خۆسەری لە رۆژئاوای كوردستان ئاشكراكردووە ھەر لە سەرەتای پێكدادانی نێوان "ھەسەد" و سوپای توركیا و ھێزە بەرھەڵستكارەكانی سووریا سەر بە توركیا.

عبدی لە چاوپێكەوتنەكەدا باسی ھەندێك كەسایەتی نا سووریایی كردووە، كە لە لایەن "پەكەكە"وە مەشقیان پێكراوە لە رۆژئاوای كوردستان.

گوتیشی: ھەبوونیان لەوێ لە ئەنجامی پێداویستییەكانی مەیدانی بووە بە ھۆی ئەو شەڕەی رێكخراوی "داعش" سەپاندی، وەك لە راپۆرتەكەدا ھاتووە.

جەختیشیكردەوە، "بەھەزاران لە چەكدارانی مەشقپێكراوی پەكەكە ھاتنە سووریا و لە تەك خۆبەخشەكان شەڕیان كرد، ھەندێكیان لە شەڕدا كوژران، ھەندێكیان رۆیشتن و ناوچەكەیان جێھێشت وئەوانەی دیكە مانەوە و زۆریشیان ھەوڵیاندا ژیانێكی مەدەنیانە بژین".

ھەروەھا فەرماندەی "ھەسەدە" باسی لە ھەبوونی رێككەوتنێك كرد بۆ كشاندنەوەیان لە سووریا بەشێوەیەكی پەیتا پەیتا. ئاماژەشی بە ھەبوونی 200 ھەزار چەكداری سووریایی كرد، كە لە لایەن دەزگاكانی مەدەنی و سەربازی "بەڕێوەبەرایەتی خۆسەر" تۆماركراون.

گوتیشی: پێوستییەكی راستەقینەمان نییە بە پشتیوانی كوردی ناوچەیی (چەكداران پەكەكە ئەوانەی سووریایی نین) و خشتەیەكی دیاریكراویش نییە بۆ كشاندنەوەیان، بەڵام پرۆسەكە دەستیپێكردووە و بەردەوامیش دەبێت.

ئەنقەرە زۆر جار بە توڕەییەوە بۆ ھاوتا ئەمەریكاییەكان و لە كۆبوونەكانیاندا لەگەڵ (كۆمەڵەی تەنگژە نێودەوڵەتییەكان) باسی لە رۆڵی فەرماندەیی ئەو كادیرانەی پەكەكە و دەسەڵاتیانی كردووە. عەبدی لەو دیدارەدا گوتی: لە میانی ناوەندگیری ئەمەریكا و وەك بەشێك لە گفتوگۆكانمان لەگەڵ كۆمەڵە كوردییەكانی دیكە، لەوانەش ئەنجوومەنی نیشتیمانی كورد (ئەنەكەسە) رێككەوتین لەسەر كشانەوەی پەیتا پەیتای ھەموو ئەو كادیرانەی نا سووریایی لەو شوێنانەی ئێستایان و دواتریش لە سووریا".

فەرماندەی ھەسەدە مەزلووم كۆبانی سەرپەرشتی ئەو دانوستانە دەكات، كە بە چاودێری وەزارەتی دەرەوەی ئەمەریكا لە نێوان ئەنجوومەنی نیشتیمانی كوردیی بەرھەڵەستكار و پارتەكانی نیشتیمانی كوردی دەكرێت و لە نیسانی رابردووەوە دەستیپێكردووە بە ئامانجی یەكخستنی ریزی كورد لە سووریا.

عەبدی خواستی خۆی دەربڕی لە كەمكردنەوەی گرژی لەگەڵ توركیا بە ناوەندگیری ئەمەریكا.

(كۆمەڵەی تەنگژە نێودەوڵەتییەكان) دەڵێت: ئاشكرایە ھەسەدە ھەوڵ دەدات ئەمریكا ناوەندگیری بكات لە نێوان خۆی و ئەنقەرەدا بۆ ئاشتەوایی. عەبدی وه‌ڵام دەداتەوە: "ئێمە تێدەگەین پەیوەندی نێوان ویلایەتە یەكگرتووەكانی ئەمەریكا و توركیا، بەپێچەوانەی گوتاریان، ستراتیجیە، دەزانین ئێمە پێویستیمان بە خاوكردنه‌وه‌ی گرژییەكانه‌ لەگەڵ ئەنقەرە، ئەگەر بمانەوێت ئەمەریكا بەردەوام بێت لە پاراستنی ئاسمانیمان. ھەڵوێستمان نەگۆڕاوە: وێڕای دوژمنكارییەكانی توركیا، ئێمە كراوەین لەسەر ھەر لێكتێگەیشتنێك لە سەر ئاسایش و دەمانەوێت ئەمەریكا ناوه‌ندگیر و دڵنیاكار بێت".

(كۆمەڵەی تەنگژە نێودەوڵەتییەكان) دەڵێت: لەگەڵ ئەوەشدا، ھێشتا ئاسان نییە خەیاڵ بكەیت، كەوا ئەنقەرە بە بەرژەوەندی خۆی دەزانێت رێككەوتنێكی تەكنیكی لەگەڵ ھەسەدە بكات، كە ئامانجی رێگرتن بێت لە زیادكردنی گرژی لەگەڵ دوژمنە كۆنەكەی، كە لەوانەیە رێگر بێت لەوەی باكووری رۆژھەڵاتی سووریا ببێتە دەوڵەتێكی بچووك بە سەركردایەتی پەكەكە یان ھاوپەیمان لەگەڵیدا.

بەپێی راپۆرتەكە، (كۆمەڵەی تەنگژە نێودەوڵەتییەكان) عەبدی جەختیكردووەتەوە لەوەی ئەگەری بەردوامبوونی ھەبوونی سەربازی ئەمەریكا پێویستە بۆ دڵنیاكردنی رێككەوتنەكە و رەشبینی خۆیشی دەربڕی لە بەرامبەر دانوستانی دوولایەنە لەگەڵ دیمەشقدا و گوتی: "كاتێك توركیا ھێرشی كردە سەر گرێ سپی، چوومە دیمەشق وەك ھەوڵێك بۆ گەیشتن بەرێككەوتنێك لەگەڵ سەركردایەتی ئەوێ، بەڵام ئەوان ئامادەنەبوون ھێچ سازشێك بكەن یان ھێچ دڵنیاییەك پێشكەش بكەن. كارەكە وانەبوو، تا بۆیان ئاشكرا بوو، كەوا ئەمەریكا لە بڕیاری پاشەكشەكردنی تەواو پاشگەز دەبێتەوە و بەشێك لەھێزەكانی دەھێڵێته‌وه‌، ئەوسا دیمەشق رازیبوو بەشێوەیەكی كاتی بەرگریی لێبكات دژ بە له‌شكركێشی توركیا.

گوتیشی: " چەندین ساڵ بوو ھەوڵمان دەدا چارەسەرییەكی مامناوەندی لەگەڵ دیمەشق بدۆزینەوە، بەڵام بێھودە بوو. ئەمڕۆ بڕوا ناكەین رێككەوتنێكی دوو لایەنی بكرێت لە نێوانماندا و لەو بڕوایەداین دەبێت رەوشی باكووری رۆژھەڵات وەك بەشێك لە رێككەوتنێكی دڵنیاكەرەوەی نێودەوڵەتی چارەسەر بكرێت، كە تەواوی سووریا بگرێتە خۆی".